Չեխիայում հոկտեմբերի 21-ից բժշկական դիմակներ կրելը պարտադիր կդառնա փողոցում և անձնական տրանսպորտային միջոցով երթևեկելիս՝ կորոնավիրուսի պատճառով: Այս մասին հաղորդում է ՏԱՍՍ-ը՝ հանրապետության առողջապահության նախարար Ռոման Պրիմուլային հղումով:
Նա հստակեցրել է, որ դիմակ կրելու անհրաժեշտություն չկա, եթե մեքենայում միայն վարորդն է, կամ եթե նրա հետ համատեղ բնակվող ընտանիքի անդամներ կան:
Հանրապետությունում դիմակ պետք է կրել նաև հասարակական վայրերում, հասարակական տրանսպորտով երթևեկելիս և միջոցառումների ժամանակ, եթե մասնակիցների միջև սոցիալական հեռավորությունը երկու մետրից պակաս է:
Դիմակ չկրելու համար նվազագույն տուգանքը մոտավորապես 4 եվրո է:
Հոկտեմբերի 14-ից Չեխիայում կտրուկ խստացվել են սոցիալական սահմանափակումները: Հանրապետությունում արգելվում են ավելի քան վեց հոգու մասնակցությամբ հավաքույթները: Դպրոցները, ռեստորանները, բարերը, ակումբները և մարզական հաստատությունները փակ են: Հոկտեմբերի 5-ից երկրում արտակարգ իրավիճակների ռեժիմ է մտցվել 30 օր ժամկետով: Համավարակի սկզբից ի վեր Չեխիայում կորոնավիրուսով վարակված մարդկանց ընդհանուր թիվը հասել է 177.974-ի: