Ռուսաստանի Դաշնության նախագահ Դմիտրի Մեդվեդևի խորհրդականներ, Ռուսաստանի ժամանակակից զարգացման ինստիտուտի ղեկավարներ Իգոր Յուրգենսն ու Եվգենի Գոնթմախերը Ведомости թերթում հրապարակել են հոդված՝ «Պուտինի վերադարձը աղետ է» վերնագրով: Այս հոդվածը, փաստորեն, բաց ուղերձ և կոչ է Մեդվեդևին՝ «հատելու Ռուբիկոնը» և հայտարարելու առաջադրման մասին, որպեսզի խուսափի Պուտինի առաջադրվելուց: Այս հոդվածն իսկական սկանդալ է առաջացրել հասարականան-քաղաքական շրջանակներում:
Հեղինակները համեմատել են Մեդվեդևի և Պուտինի վարած քաղաքականությունները՝ բացարձակ լճացում համարելով Պուտինի վարած քաղաքականությունը, որի այսպես կոչված «կայունությունը ուղիղ համեմատական է բացարձակ լճացմանը»: հեղինակները հարց են ուղղում, թե «ինչ տեղի կունենա, եթե Մեդվեդևը չառաջադրվի», և իրենք էլ պատասխանում են, որ դա լրջագույն ճգնաժամ կառաջացնի երկրում:
Նրանք բերում են մետալուրգիական հսկա «Մեչելի» օրինակը, որը գրեթե սնանկացվեց, երբ Պուտինը հայտարարեց ընկերությունում հնարավոր ստուգումների մասին: Այդ ժամանակ ընկերության բաժնետոմսերի գինը կտրուկ ընկավ, ինչը հոդվածագիրները «խաղ ու պար են» անվանում՝ համեմատած նրա հետ, թե ինչ տեղի կունենա Պուտինի՝ նախագահ դառնալուց հետո: Սրան նրանք գումարում են ներդրումների անխուսափելի արտահոսքը և արտագաղթի մեծացումը: Կոռուպցիայի նման իրավիճակը, ըստ հեղինակների, կարող է հանգեցնել հուզումների՝ «Մանեժնայա» հրապարակի օրինակով: Տնտեսական այս դժվարությունները կհանգեցնեն քաղաքական ռեժիմի խստացմանն այնպես, ինչպես դա տեղի է ունենում Բելառուսում:
Այդ պատճառով հեղինակները Մեդվեդևի առաջադրումը անվանում են ոչ միայն նրա կամ «ներտանդեմյան» խնդիր: «Նրա ձեռքերում է ոչ թե օրացուցային, այլ իրական 21-րդ դար մտնելու բանալին: Հենց այս համատեքստում մենք՝ Ռուսաստանի քաղաքացիներս, պետք է անտարբեր չլինենք, թե ով է դառնալու հաջորդ նախագահը: Մենք պահանջում ենք արդեն այդ հոգնեցրած հարցի պատասխանը, բայց ոչ թե դեկտեմբերին, այլ շատ մոտ ժամանակներում: մենք պնդում ենք, որ Դմիտրի Մեդվեդևը իր վրա քաղաքական պատասխանատվություն վերցնի երկրի ապագայի համար՝ որպես 2012-2018 թթ. նախագահ»,- գրել են Յուրգենսն ու Գոնթմախերը:
