«Ճգնաժամային այս պայմաններում փոքր ու միջին ձեռնարկությունների համար ամենամեծ խնդիրը ֆինանսական ռեսուրսների բացակայությունն է, որի հետևանքով գործատուները չեն կարողանում աշխատակիցների աշխատավարձը վճարել, տարածքի վարձակալության և կոմունալների գումարը մուծել, հարկային պարտավորությունները պատշաճ կատարել և այլն, և այլն:
Երկրորդ հիմնական խնդիրը ճգնաժամային կառավարման հետ էր կապված, այսինքն՝ ստեղծված իրավիճակում հարկավոր էր որոշումներ կայացնել գործունեության հետագա ընթացքի հետ կապված՝ փակվել, վերապրոֆիլավորվել, կրճատումներ անել, որոշ ժամանակով դադարեցնել աշխատանքը, թե այլ տարբերակներ. շատ դեպքերում հենց այդ որոշումների արագ կայացման բացակայությունն էլ որոշ չափով ունեցավ իր բացասական հետևանքները փոքր ու միջին բիզնեսի վրա»: Այս մասին «Առաջին լրատվական»-ի հետ զրույցում նշեց տնտեսագետ Գևորգ Պողոսյանը՝ միևնույն ժամանակ հավելելով նաև, որ կառավարությունը պետք է ճիշտ հասկանար բիզնեսին և այս ծանր պայմաններում հարկային որոշակի արտոնություններ սահմաներ, ինչը սակայն, տեղի չունեցավ:
Տնտեսագետը նկատեց՝ ճիշտ է, թեպետ կառավարության հակաճգնաժամային ծրագրերի շրջանակներում որոշակի աջակցություն տրամադրվեց տնտեսվարող սուբյեկտներին, որոնց օգնությամբ նրանք կարողացան կարճաժամկետ առումով իրենց խնդիրները լուծել, սակայն գլոբալ առումով այդ խնդիրները դեռևս տևական ժամանակ շարունակելու են առկա լինել՝ առավել ևս, երբ առջևում դեռ անորոշություններ կան՝ գլոբալ տնտեսական իմաստով:
«ՓՄՁ-ները մեծ մասամբ ադապտացվել են այն վիճակին, որը հիմա առկա է, հետևաբար՝ մինչև սեպտեմբերի 11-ը երկարաձգված արտակարգ դրությունը, կարծում եմ, որ նրանց մոտ հակահամաճարակային կանոնների պահպանման առումով որևէ լրացուցիչ խնդիր չի առաջացնի՝ հատկապես ծառայությունների և սպասարկման ոլորտի մասին է խոսքը, կկարողանան աշխատել: Ինչ վերաբերում է այն տնտեսվարողներին, որոնց գործունեությունը հիմնականում կապված է ներմուծման հետ, և հասկանալի պատճառներով հիմա նրանք չեն կարողանում այլ երկրներից նախկին ծավալներով ներմուծում իրականացնել կամ նախկինի պես անձամբ մեկնել և տեղում կազմակերպել բեռնափոխադրման գործընթացը, ապա, ըստ իս, այդ մասով պետք է ըմբռնումով մոտենալ, որովհետև եթե մեզ մոտ, օրինակ, արտակարգ դրությունը երկարաձգվել է, բայց դրան զուգահեռ սահմանափակումներն ինտենսիվ կերպով թուլացվել են, ինչպես նաև թույլատրվել է այլ երկրի քաղաքացիների մուտքը Հայաստան՝ հակահամաճարակային որոշակի կանոնների պահպանմամբ, ապա այլ երկրներն իրենց սահմաններն ամբողջությամբ չեն բացել, և մուտքը նրանց երկիր դեռ փակ է: Իսկ արտահանումն իր հերթին նվազել է, որովհետև այլ երկրներում ևս պահանջարկի չափը նույնը չէ, սպառման ծավալը նվազել է, վաճառքն այլևս առաջվանը չէ»,- ընդգծեց Գևորգ Պողոսյանը:
Վերջինիս կարծիքով՝ առկա տնտեսական իրավիճակում կառավարության կողմից իրականացված սոցիալական աջակցության ծրագրերը բավականին արդյունավետ են եղել:
Այս համատեքստում նկատենք, որ կառավարությունն այս ամիսների ընթացքում այդ ծրագրերի շրջանակներում ծախսել է շուրջ 144,5 միլիարդ դրամ, ինչը, տնտեսագետի գնահատմամբ՝ բավականին զգալի ցուցանիշ է պետություն-մասնավոր սեկտոր համագործակցության տեսանկյունից:
Այսուհանդերձ, Պողոսյանը նկատեց՝ բազմաթիվ ՓՄՁ-ներ այսօր հայտնվել են փակման եզրին, իսկ ոմանք էլ ծախսերի և աշխատակիցների կրճատումներ են անում՝ գործունեությունը վերջնականապես չդադարեցնելու համար:
«Կրճատումները շատ են հատկապես տուրիզմի և սպասարկման ոլորտում՝ ռեստորաններում, սրճարաններում և այլն:
Սակայն ներկա դրությամբ գործազրկության ավելացման կոնկրետ թիվ հրապարակել դեռևս չեմ կարող, ամեն ինչ դեռ այդքան էլ հստակ չէ, շատ անորոշություններ կան, և պետք է մի փոքր էլ սպասենք: Առաջիկայում՝ գուցե արտակարգ դրության ավարտից որոշ ժամանակ անց, այս մասով մենք անպայման հետազոտություն ենք իրականացնելու, որի արդյունքները կհրապարակենք: Իսկ այսօրվա վիճակով, թեկուզ մոտավոր թվերով կանխատեսումներ կրճատումների վերաբերյալ, անկեղծ ասած, չէի ցանկանա անել: Վերլուծությունը ցույց կտա»,-եզրափակեց նա:
Լուսանկարը՝ Armeniasputnik-ի
