Բելառուսի ռազմաօդային ուժերի և ՀՕՊ զորքերի հրամանատարի ժամանակավոր պաշտոնակատար, գնդապետ Օլեգ Օրլովը մեկնաբանել է Լիտվայի օդային տարածքը խախտելու վերաբերյալ մեղադրանքները՝ գրում է mk.ru-ն:
Ըստ նրա՝ օգոստոսի 23-ին՝ երեկոյան, «Կամեննի Լոգ» սահմանային անցման տարածքում հերթապահող օդուժը կասեցրել է Լիտվայի կողմից Բելառուսի օդային տարածքը խախտելու փորձը:
Ինչպես նշվում է Բելառուսի ՊՆ կայքում, միջադեպը այնտեղ դիտվում է որպես սադրանք Վիլնյուսի կողմից: Մինսկը նշում է, որ չի կարելի խախտել պետական սահմանը, նույնիսկ եթե քաղաքացիները ցանկանում են «կատակ անել, փուչիկներ բաց թողնել»:
Ըստ Օրլովի՝ «այդ թվացյալ անվնաս փուչիկները սպառնալիք են ներկայացնում թռիչքների անվտանգության համար՝ ներառյալ քաղաքացիական օդանավերը»:
Ավելի վաղ Բելառուսը մեղադրել էր Լիտվային փուչիկներով երկինք բարձրացված անօդաչու սարքի միջոցով իր երկրի պետական սահմանը խախտելու փորձի համար: Փուչիկները ներկված են եղել բելառուսական ընդդիմության դրոշի գույներով:
