Sky News Arabia հեռուստաալիքի փոխանցմամբ, Լիբիայի ազգային բանակի հրամանատար Խալիֆա Հաֆթարը հայտարարել է, որ մտադիր է երկրից վտարել թուրքական զորքերին, ինչպես նաև օտարերկրյա վարձկաններին:
«Մեր հայրենիքը վտանգի տակ է, նրա ներկային և ապագային սպառնում է ատելի թուրքական գաղութատիրությունը,- նշել է ֆելդմարշալը:- Թուրքիայի ագրեսիան սպառնում է տարածաշրջանում Լիբիայի միասնությանն ու կայունությանը: Այդ երկիրը ձգտում է վերահսկել Լիբիայի ռեսուրսներն ու հարստությունը՝ իր տնտեսական ճգնաժամը հաղթահարելու նպատակով»:
«Մենք համաձայնեցինք միջազգային հանրության քաղաքական կարգավորման վերաբերյալ պայմանավորվածություններ ձեռք բերելու պահանջներին, բայց մենք թույլ չենք տա այդ ժամանակահատվածն օգտագործել զենք ու վարձկաններ Լիբիա տեղափոխելու համար… և մենք պայքարելու ենք թուրքական ագրեսիայի դեմ… Մենք չենք նահանջի մինչև թուրք զավթիչների և նրանց վարձկանների արտաքսումը»,- հայտարարել է նա: