Թուրքիայի բարձրագույն վարչական դատարանում Սուրբ Սոֆիայի տաճարի (Այա Սոֆիա) կարգավիճակի հարցով տեղի է ունեցել նիստ, որի ընթացքում կայացված որոշումը գրավոր կհրապարակի օրենքով սահմանված 15-օրյա ժամկետում, հայտնել է նիստը վարող դատավորը։
Ստամբուլի պատմական կենտրոնում գտնվող բյուզանդական Այա Սոֆիա հռչակավոր տաճարի կարգավիճակը թանգարանից մզկիթի փոխելու հարցը Թուրքիայի բարձրագույն վարչական դատարանում քննարկվել է «Մնայուն հիմնադրամի պատմական ժառանգության ու շրջակա միջավայրի պահպանության միության» նախաձեռնությամբ։
Միությունը ներկայացրած հայցում պահանջում է չեղարկել տաճարին թանգարանի կարգավիճակ շնորհած թուրքական կառավարության 1934 թ.-ի որոշումը։ Եթե 15 օրվա ընթացքում հրապարակվելիք վճիռը հակաիրավական ճանաչի կառավարության 1934 թ. որոշումը, ապա այն չեղյալ կհայտարարվի, իսկ Սուրբ Սոֆիայի տաճարն էլ կվերածվի մզկիթի։
