Ազգային ժողովի կողմից Սահմանադրական փոփոխությունների նախագծի ընդունմամբ դադարեցվում են ՍԴ անդամներ Ալվինա Գյուլումյանի, Ֆելիքս Թոխյանի և Հրանտ Նազարյանի լիազորությունները, Հրայր Թովմասյանը դադարում է լինել ՍԴ նախագահ:
Թեմայի շուրջ «Առաջին լրատվական»-ի հետ զրույցում փաստաբան Տիգրան Եգորյանը նշեց, որ այս օրինագծով դադաարեցվում է ՍԴ բոլոր այն անդամների լիազրությունները, որոնք պաշտոնավարել են 12 տարի, պաշտոնավարման 12 տարին չլրացած ՍԴ անդամները շարունակում են պաշտոնավարել՝ որպես ՍԴ դատավորներ: ՍԴ նախագահի պաշտոնավարումը ևս դադարեցվում է. «ՍԴ-ն իր կազմից պետք է ընտրի ՍԴ նախագահ: Այս օրենսդրական փոփոխությունն ուժի մեջ կմտնի, երբ նախագահի կողմից կստորագրվի և կհրապարակվի ԱԺ նախագահի կողմից»:
Անդրադառնալով Վենետիկի հանձնաժողովի խորհրդատվական կարծիքին՝ փաստաբանը նշեց, որ Վենետիկի հանձնաժողովն իր այս կարծիքով համաձայնություն է հայտնել և արձանագրել, որ ՀՀ-ում առկա է ՍԴ ճգնաժամ, համաձայնել և հաստատել է, որ ՀՀ-ում գործող քաղաքական մեծամասնությունը, այսինքն՝ այն պետական մարմինները, որոնք իրավասու են և նախաձեռնել են այս գործընթացը, ունեն իրավաչափ և ազնիվ նպատակներ, որոնք միտված չեն ՍԴ նկատմամբ վերահսկողություն սահմանելուն. «Վենետիկի հանձնաժողովն ընդհանուր առմամբ դրական է գնահատել այն կոնցեպցիան, որը ներկայացվել է ՍԴ ճգնաժամի լուծման կապակցությամբ»:
Փաստաբանը նաև ընդգծեց, որ Վենետիկի հանձնաժողովի դիտարկմամբ՝ եթե ՍԴ-ն որոշի տապալել օրենսդիր իշխանության այս փոփոխությունները, ապա շատ վտանգավոր գործընթաց կսկսվի. «Եվ շատ կասկածելի կլինի այն առումով, որ դա ոչ թե Սահմանադրությանը համապատասխանության ստուգման արդյունք կլինի, այլ հակամարտության»:
«ՍԴ-ն չունի այնպիսի կազմ և անդամներ, որոնք կկարողանան սահմանադրական այս փոփոխության քննությունն իրականացնել և չդիտարկվել որպես կողմնակալ և շահագրգիռ»,- նշեց Տիգրան Եգորյանը՝ հավելելով, որ ՍԴ անդամների դիրքորոշման համաձայն՝ չկա ՍԴ ճգնաժամ և չկա այսպիսի փոփոխության անհրաժեշտություն:
Մանրամասն՝ տեսանյութում: