Հայաստանում արդեն սկսում են նախապատրաստվել ապրիլի 5-ին անցկացվելիք հանրաքվեին, որով պետք է հանգուցալուծվի Սահմանադրական դատարանի շուրջ ստեղծված ճգնաժամը։
Ի՞նչ եք կարծում՝ սա Սահմանադրական դատարանի ճգնաժամը լուծո՞ղ հանրաքվե է, թե՞ Փաշինյանի կառավարության վստահության հանրաքվե է․ «Առաջին լրատվական»-ի հարցին վրացական «Ալիք մեդիա»-ի գլխավոր խմբագիր Արսեն Խառատյանը պատասխանեց․ «Անպայման երկուսն էլ։ Իրավական հարթությունում արգումենտներ բերող գործընկերները, հատկապես այն մարդիկ, որոնք երկու տասնամյակից ավելի նախորդ իշխանության բոլոր հանցագործությունները միջազգային կառույցներում արդարացնելով են զբաղված եղել, հիմա էլ «լավաշային տրամաբանությամբ» մեզ բացատրում են, թե որտեղ է դրա հակաիրավականությունը։ Ես կարծում եմ, որ սահմանադրական հանրաքվե հայտարարելն իրավական և քաղաքական առումով անխոցելի է, էթիկական իմաստով, այո, ժողովուրդն այստեղ ասելիք ունի, և կարելի է քննարկել»։
Ըստ ձեզ՝ գործընթացը քաղաքական նպատակահարմարությամբ պայմանավորված համարել չի կարելի՝ մի խումբ մարդկանց կողմից զավթված Սահմանադրական դատարանը պետք է շուտափույթ վերադարձնել ժողովրդին․ «Առաջին լրատվական»-ի դիտարկմանը Արսեն Խառատյանը պատասխանեց․ «Սա 2018 թվականի հեղափոխության վերջին քարն է՝ պիտի մաքրենք այդ համակարգը։ Մարդիկ, որոնք գրել են այսպիսի Սահմանադրություն, իրավունք չունեն իմ դատավորը լինել։ Այսինքն՝ Սահմանադրությունն անգամ Սերժ Սարգսյանի համար չի գրված, այլ, ինչպես նշում են մեր որոշ գործընկերներ՝ Հրայր Թովմասյանի, որովհետև, պարզվում է, որ այլ շրջանցման ճանապարհ մենք չունեինք։ Այդ դեպքում մենք ասում ենք՝ եթե չեք թողել որևէ կետ, որ կարող ենք փոփոխություն կատարել, ապա մենք կգնանք ուղիղ ժողովրդավարության ճանապարհով»։
Մանրամասները՝ տեսանյութում։
