Կիրակի, փետրվարի 2-ին, Ռուսաստանի Դաշնության կազմում գտնվող Թաթարստանի մշակույթի նախարար Իրադա Այուպովայի դստեր հարսանիքն էր՝ ժամանակակից արվեստի պատկերասրահում: Այս մասին հայտնում է Ալեքսեյ Նավալնու Կազանի շտաբը:
Թանգարանի ինստագրամյան էջի համաձայն, պատկերասրահը փետրվարի 1-ին աշխատել է մինչեւ 18:00, իսկ փետրվարի 2-ին փակ է եղել «տեխնիկական պատճառներով»: Շտաբի աշխատակիցները ինստագրամում լուսանկարներ եւ տեսանյութեր են տեսել, որոնք հաստատում են, որ հարսանիքը տեղի է ունեցել թանգարանում հենց այդ օրը:
Թաթարստանի մշակույթի նախարարությունից պարզաբանել են, որ որ այս դեպքը լիազորությունների չարաշահում չէ, քանի որ պատկերասրահն ընդգրկված է մշակութային հաստատությունների ցանկում, որտեղ ամուսնության գրանցումը թույլատրվում է, ծառայությունը հասանելի է բոլոր զույգերի համար:
Նշվում է, որ հանրապետությունում թույլատրված են հարսանիքներ թանգարաններում, պատկերասրահներում: Ընտանեկան-ամուսնական կապերը հանրայնացնելու նպատակով Թաթարստանի ժողովրդագրական զարգացման համապարփակ ծրագրի իրականացման շրջանակներում գնացել են ահա այսպիսի քայլի: Թանգարանում հարսանիք անցկացնելու հայտ կարող է ներկայացնել յուրաքանչյուր ցանկացող, նորապսակները միայն պետք է վճարեն մուտքի գրանցման տուրքը եւ հյուրերի տոմսերի գումարը:
Ակտիվիստները զանգահարել են պատկերասրահ եւ հարցրել են, թե կարելի է արդյոք այն վարձակալել մի միջոցառման համար: Պատկերասրահից պատասխանել են, որ այն վարձով չի տրվում:
Նախարարը հայտարարել է, որ իրոք, աղջկա հարսանիքը տեղի է ունեցել պատկերասրահում, ընդգծելով, որ դա օրենքի խախտում չի: «Հարցը թանգարանը վարձով տալու մեջ չի: Ես ամեն ինչ արել եմ օրենքի շրջանակներում, եւ ես ունեմ դրանք հաստատող փաստաթղթերը»,-ավելացրել է Թաթարստանի մշակույթի նախարար Այուպովան: