Խորհրդարանում բանավեճերի առիթ տված Քրեական դատավարության օրենսգրքում լրացում կատարելու մասին օրենքի նախագծին անդրադարձավ արդարադատության նախարար Ռուստամ Բադասյանը՝ անելով ուշագրավ հայտարարություն. «Պետությունն այս պահին այնքան հզոր է, որ թող որևէ մեկը համարձակվի անկարգություններով մեզ սպառնա։ Մենք ունենք ներքին զորքեր, մենք ունենք քրեակատարողական համակարգում արտակարգ իրավիճակ հայտարարելու հնարավորություն և իրավական հիմք։ Եվ թող մեկը փորձի իր բախտն ու փորձի պետության հետ սպառնալիքի լեզվով խոսել»։
Հասարակական-քաղաքական դաշտում նախարարի այդ հայտարարությունը բուռն արձագանք է ստացել։ Շատերի դիտարկմամբ՝ Բադասյանը բացահայտ սպառնալիք է հնչեցրել և, ըստ իրենց՝ խնդրահարույց օրենքներն իշխանությունները պատրաստվում են բիրտ մեթոդներով իրականացնել և ոչնչով չեն տարբերվում նախկին իշխանություններից։
Իրավապաշտպան Ժաննա Ալեքսանյանի կարծիքով՝ արդարադատության նախարարը պետք է իր միտքը մինչև վերջ պարզաբաներ։ «Ըստ իս՝ նա ցանկացել է խոսել այդ միջոցների մասին առհասարակ։ Բայց քանի որ մեր հանրությունը շատ երկար եղել է ոստիկանության բռնի ուժի ներքո և դեռ ամբողջությամբ վարժված չէ այս նոր իրավիճակին, պետք էր ավելի հստակ խոսել։ Չգիտեմ, թե ովքեր են քննադատողները, բայց շատ արագ ամեն ինչ վերհիշվում է, շատ քիչ ժամանակ է այդ մթնոլորտից անցել»,- «Առաջին լրատվական»-ի հետ զրույցում ասաց նա։
Ըստ Ալեքսանյանի՝ նախարարը խոսել է օրինական միջոցներից և պետք է պարզապես մինչև վերջ պարզաբաներ, որպեսզի հասկանալի լիներ ու շահարկումների տեղ չտար։
Քաղաքական մեկնաբան Հակոբ Բադալյանի կարծիքով՝ պետության օրինական իրավունքն է անհրաժեշտության դեպքում նաև այդ մեխանիզմներով հասարակական կարգ ու օրինականություն հաստատել։ «Խնդիրը հետևյալն է. այդ միջոցները կիրառվում են օրենքի շրջանակներո՞ւմ, թե՞ օրենքի խախտումով։ Մենք միայն սրանով կարող ենք եզրակացություն անել՝ դա սպառնալի՞ք է, իշխանության չարաշահո՞ւմ, թե՞ օրինականության հաստատում։ Եթե մենք խոսում ենք քրեական ենթամշակույթի մասին, ապա մենք գիտենք, թե սրա դրսևորումները մեր հասարակական-քաղաքական կյանքում ինչ հետևանքներ են ունենում։ Անկասկած է՝ եթե ինքնակարգավորման մեխանիզմներ չկան հանրային ինստիտուցիոնալ առումով, ապա պետությունը պետք է կիրառի կարգավորման իր իրավական լծակները»,- «Առաջին լրատվական»-ի հետ զրույցում ասաց նա։
Ըստ մեր զրուցակցի՝ արդարադատության նախարարի հայտարարությունը պետք է դիտարկել վերը նշվածի համատեքստում. «Առ այն, որ պետությունը հավաստիացնում է, որ ունի ուժ օրինականություն ու իրավականություն ապահովելու՝ ընդհուպ քրեակատարողական հիմնարկներում»։
Հակոբ Բադալյանի դիտարկմամբ՝ նախկին իշխանությունների հետ համեմատականները տեղին չեն։ «Եթե արդարադատության նախարարությունը հայտարարեր, որ ոստիկանության զորքով կճնշեն հանրահավաքներ, քաղաքական ընդդիմախոսներին՝ դա կարող էր սպառնալիք դիտարկվել։ Բայց երբ հայտարարում են, որ ոստիկանության զորքով իրենք ի զորու են կարգուկանոն, օրինականություն հաստատել քրեակատարողական հիմնարկներում, ապա ոչ միայն անհեթեթ է դա որպես սպառնալիք դիտարկելը, այլ հակառակը՝ այդպիսի հավաստիացում պետությունը պետք է անի և վատ է, եթե պետությունը չունենա այդ կարողությունը ու չկարողանա իրականացնել իր պարտականությունը՝ օրինականություն ապահովել քրեակատարողական հիմնարկներում»,- եզրափակեց նա։
