Արդարադատության նախարարությունը հայտարարություն է հրապարակել Սահմանադրական բարեփոխումների մասնագիտական հանձնաժողովի անդամների թեկնածության հայտեր ներկայացնելու վերաբերյալ: Ստեղծվելիք հանձնաժողովի կազմում ՀՀ դատական և իրավական բարեփոխումների 2019-2023թթ. ռազմավարությանը համապատասխան մրցութային ընթացակարգով ընդգրկվելու են 6 իրավաբան-գիտնական և հասրակական կազմակերպությունների ներկայացուցիչ: Վերջիններիս ներկայացվող պահանջները նախատեսված են նշված որոշմամբ: Այսպիսով՝ տրվում է կարևոր գործընթացի մեկնարկ:
Թեմայի շուրջ «Առաջին լրատվական»-ը զրուցեց «Իրազեկ քաղաքացիների միավորում» ՀԿ համակարգող Դանիել Իոաննիսյանի և «Իրավաբանների հայկական ասոցիացիայի» փորձագետ Արտյոմ Մեսրոպյանի հետ:
Անդրադառնալով Սահմանադրական բարեփոխումների մասնագիտական հանձնաժողովի ձևավորման ընթացակարգին՝ Արտյոմ Մեսրոպյանը նշեց, որ նախորդ սահմանադրական բարեփոխումների հանձնաժողովների կազմավորման գործընթացներից տարբերությունն ակնհայտ է. «Այս անգամ փորձ է արվել ավելի ներառական դարձնել գործընթացը, և դրա վկայությունն այն է, որ և՛ քաղհասարակության ներկայացուցիչներին է հնարավորություն ընձեռվում ընդգրկվել հանձնաժողովում, և՛ խորհրդարանական ընդդիմության ներկայացուցիչներին, ինչպես նաև հանձնաժողովի գերակշռող մասը իրավաբան-գիտնականներ են լինելու և ՀԿ ներկայացուցիչներ, հանձնաժողովում ընդգրկվելու են նաև անկախ մարմինների ներկայացուցիչներ, օրինակ՝ Մարդու իրավունքների պաշտպանը. նման մոտեցումը ողջունելի է»:
Սահմանադրական բարեփոխումների խոստումը տրվել է դեռ հեղափոխության ժամանակ, թերևս այս գործընթացը կարող էր ավելի վաղ սկսվել: Անդրադառնալով այս դիտարկմանը՝ Դանիել Իոաննիսյանը նշեց. «Դեռ ամիսներ առաջ արդարադատության նախարարը հայտարարել էր, որ այս տարեսկզբին գործընթացը կսկսվի, և հիմա այդ ժամանակացույցի համաձայն, գործընթացի մեկնարկը տրվել է: Ինչու նախկինում չի սկսվել գործընթացը. գիտեք՝ այնքան բան պետք է արվեր մեկ տարի, կես տարի առաջ, բայց չի արվել: Թերևս սահմանադրական փոփոխությունների հարցում շտապել պետք չէր: Պետք է հասկանալ՝ ինչ փոխհարաբերություններ են ձևավորվում ժողովրդավարական Հայաստանում և երկարաժամկետ առումով ինչպես պետք է շարժվել առաջ: Սահմանադրական փոփոխությունները ափալ-թափալ լուծելու հարց չէր, բայց կային հարցեր, որ պետք է շատ արագ լուծվեին, օրինակ Ն. Փաշինյանի խոստումն էր, որ Կուսակցությունների մասին օրենքը պետք է վերանայվեր, բայց մինչև այժմ ոչինչ չի արվել: Բազմաթիվ այլ հարցեր կան, որոնք օր առաջ պետք է լուծվեին, բայց այսօր դեռ լուծում չեն գտել:
Դանիել Իոաննիսյանի կարծիքով՝ նոր Սահմանադրությամբ պետք է վերանայել նաև նախագահական ինստիտուտը:
Մանրամասն՝ տեսանյութում: