Վարչապետ Ռեջեփ Թայիփ Էրդողանի հայտարարությունը Թուրքիայի հայկական սփյուռքը գնահատել է որպես հաշտեցման կարևոր քայլ: «Անհրաժեշտ է աջակցել Անկարայի՝ հաշտեցման ձգտումը: Այս քայլով նա կարող է ապագայում Նոբելյան մրցանակի թեկնածու դառնալ»,-հայտարարել է Թուրքիայում հայկական սփյուռքի նախագահ Բեդրոս Շիրինօղլուն: Այս մասին գրում է Ria Novosti-ն:
Շիրինօղլուն նշել է, որ Էրդողանն առաջին թուրք քաղաքական գործիչն է, ով ցավակցություն է հայտնել հայ համայնքին և խոստացել կանաչ լույս վառել Ցեղասպանության զոհերի ունեցվածքը սերունդներին վերադարձնելու համար: Նա կարծում է, որ ի պատասխան՝ հայերը ևս պետք է թուրքերից ներողություն խնդրեն մեկդարյա վաղեմության իրադարձությունների համար:
«Եթե հաշտեցման նման քայլերը դառնան միտում, գործընթացը կավարտվի նրանով, որ երկու հին բարեկամները կհաշտվեն, ինչը իսկապես կարող է արժանի լինել Նոբելյան մրցանակի»,- հավելել է նա:
