Ըստ տեղական ոստիկանության, բրիտանական Միդսոմեր Նորթոն քաղաքում վերամշակման կենտրոնի աշխատակիցները հայտնաբերված 15 հազար ֆունտը վերադարձրել են զույգին, որը պատահաբար աղբն է նետել տուփը, հայտնում է «ՌԻԱ Նովոստին»:
Դեռևս նոյեմբերին կոմունալ ծառայությունները Սոմերսեթ և Ավոն շրջանային ոստիկանություն անսովոր գտածո էին հանձնել, բայց իրավապահ մարմիններն այդ մասին հրապարակեցին միայն մեկ ամիս անց: «Միդսոմեր Նորթոն» կենտրոնի աշխատակիցները, որոնք հավաքում և վերամշակում են թափոնները, կենցաղային իրերի մի տուփ են գտել, մեջը թաքցված է եղել մեկ այլ տուփ, որում, ինչպես պարզվել է, փողեր են եղել: Ոստիկաններն, օգտագործելով տեսախցիկների ձայնագրությունները, գտել են տուփը նետած մարդկանց: Նրանք իրավապահ մարմիններին ասացին, որ վերջերս Բաթ քաղաքում մահացած հարազատի տունը մաքրելիս մի քանի փաթեթներ և իրեր տարել են վերամշակման կետ:
«Նրանք նշեցին, որ ազգականը հայտնի էր տան անսպասելի վայրերում գումար թաքցնելու սովորությամբ, բայց, չնայած դրան, նրանց զարմացրել է գտնված 15 000 ֆունտ կանխիկ դրամը»,- ասվում է ոստիկանության ֆեյբուքյան էջում:
Ոստիկանությունը շնորհակալություն հայտնեց վերամշակման կենտրոնի աշխատակիցներին. «եթե նրանց ուշադրությունը, պարկեշտությունն ու օգնությունը չլիներ, այդ ընտանիքը երբեք չէր իմանա փողի մասին», իսկ իրավապահ մարմինները «երբեք չէին կարողանա այն վերադարձնել ճիշտ ժամանակին՝ Ծննդյան տոների կապակցությամբ»: