ՖԻՖԱ-ն հրապարակեց 2019 թվականի ամփոփիչ դասակարգման աղյուսակը: Մենք հարյուրյակից դուրս ենք, տարին ավարտում ենք 102-րդ հորիզոնականում: Այս պահին մնում է թերևս արձանագրել, որ մենք օբյեկտիվորեն տեղ չունենք լավագույն հարյուրյակում: Մենք գտնվում ենք անդունդում, որից դուրս գալու համար անհրաժեշտ են միայն ու միայն վիրահատական միջամտություններ:
Դեկտեմբերի 23-ին տեղի կունենան ՀՖՖ նախագահի և գործկոմի ընտրությունները: ՀՖՖ նոր ղեկավար կազմի գործողությունների առանցքում պետք է լինեն հենց վիրահատական գործողությունները: Մասնավորապես, անհրաժեշտ է ազգային թիմի մասով գոնե կարճաժամկետ ծրագիր՝ սայլը տեղից շարժելու համար: Այն, որ հնին վերադարձ չպետք է լինի, պարզից էլ պարզ է: Մաշված համակարգի տասնամյակների գործունեության հետևանքն է, որ մենք այսօր տեղ չունենք հարյուրյակում:
Ինչևէ, ժամանակին, երբ մեր հավաքականը նահանջում էր ՖԻՖԱ-ի դասակարգման աղյուսակում, բոլորը պնդում էին, որ ֆուտբոլային թիվ մեկ կառույցի վարկանիշային ցուցակը չի արտացոլում իրական պատկերը: Շատերն այն կարծիքին են, որ ֆուտբոլային թիվ մեկ կառույցը սխալ հաշվարկ է կատարում և օբյեկտիվորեն չի բաշխում միավորներն ազգային հավաքականներին: Տարիներ առաջ, սակայն, երբ մեր հավաքականը հայտնվեց 30-րդ հորիզոնականում, հպարտանում էինք, նույնիսկ «գլուխ գովում»: Այսինքն՝ դասակարգման այս աղյուսակին շատերը վերաբերվում են այնպես, ինչպես ձեռք է տալիս, ըստ իրավիճակի:
Մինչև Իտալիայի հետ հանդիպումը երկրպագուների հիմնական մասը վստահ էր, որ մեր հավաքականը կջախջախի դասակարգման աղյուսակում մեր հարևանությամբ գտնվող ֆուտբոլային «գաճաճներին»: Հիմա արդեն նման համոզմունք ունեցող մարդկանց թիվը այնքան էլ մեծ չէ: Այո, հնարավոր է, որ Վիետնամի հետ մրցելու դեպքում հաղթենք, բայց դա չի նշանակում, որ արժանի ենք դասակարգման աղյուսակում այս երկրի հավաքականից ավելի բարձր դիրք ունենալուն: Վերջին տարիներին մեր հավաքականն այն աստիճան անհաջող է ելույթ ունենում, որ վարկանիշից դժգոհելու մասին խոսելու իրավունք ուղղակի չունենք: Կարող ենք ասել, որ Եվրոպայի կտրվածքով ամենաթույլերից մեկն ենք: Եթե ժամանակին մեզ մի գլուխ բարձր էինք դասում, օրինակ, Լյուքսեմբուրգից, Անդորրայից, Լիխտենշտեյնից, ապա այսօր չկա վստահություն, որ այս հավաքականների հետ մրցավեճերում կկարողանանք երեք միավոր վաստակել: Անցյալ տարի չկարողացանք հաղթել Մալթային, ոչ-ոքի խաղացինք Լիխտենշտեյնի հետ, պարտվեցինք Ջիբրալթարին: Այս տարվա հունիսին կրկին մրցեցինք Լիխտենշտեյնի հետ: Հաղթեցինք, և թվում էր, թե սայլը տեղից շարժվում է: Այնուհետև տոնեցինք ևս երկու հաղթանակ, բայց… Կրկին հանդիպեցինք Լիխտենշտեյնին, կրկին ոչ-ոքի խաղացինք և հասկացանք, որ կանգնած ենք կոտրած տաշտակի առաջ:
Հնարավոր է՝ շատերը չհամաձայնեն, բայց ՖԻՖԱ-ի դասակարգման 102-րդ հորիզոնականը արտացոլում է մեր հավաքականի իրական դիրքը համաշխարհային ֆուտբոլում: Ավելին, այսօր աշխարհում մատների վրա կարելի է հաշվել այն հավաքականներին, որոնք 2019 թվականին 9 գնդակ են բաց թողել: Եվրոպայում, բացի Հայաստանից, 9 գնդակ ընդունել է միայն Սան Մարինոյի կիսապրոֆեսիոնալ հավաքականը: Մենք ՈՒԵՖԱ-ի անդամ ենք, գտնվում ենք եվրոպական գոտում, որտեղ կան 55 հավաքականներ: Թե՛ խաղի որակով, թե՛ արդյունքներով այսօր Եվրոպայում մոտավորապես 50-րդն ենք:
ՖԻՖԱ-ի ցուցակում Հայաստանից ավելի լավ դիրքում գտնվող ոչ եվրոպական հավաքականները ցույց են տվել արդյունք: Օբյեկտիվորեն նրանք արժանի են մեզնից ավելի բարձր հորիզոնականում լինելու: Ի տարբերություն Գաբոնի կամ Պաղեստինի՝ մենք արդյունք չենք գրանցում: Մենք շարունակում ենք պարտվել և շարունակելու ենք պարտվել, եթե փրկության համար լուրջ քայլեր չձեռնարկվեն:
Եկել է ժամանակը՝ հասկանալու, որ ՖԻՖԱ-ի աղյուսակը ոչ թե դասակարգման, այլ արժանիքների աղյուսակ է: Այո, եղել ենք ավելի ցածր դիրքերում, նահանջել ենք մինչև 123-րդ հորիզոնական: Նշանակում է, որ այդ պահին արժանի ենք եղել լինելու այդ դիրքում: 9:1 հաշվով պարտությունից հետո կարո՞ղ ենք պնդել, որ 102-րդը չի արտացոլում մեր հավաքականի իրական պատկերը: Եթե խիղճներս էլ կորցնենք, կկարողանանք ասել, որը 102-րդը դեռ շատ է Հայաստանի հավաքականի համար: Նույն Լիխտենշտեյնի հավաքականն այսօր՝ 180-րդ, Մալթան՝ 184-րդ, Ջիբրալթարը 196-րդ տեղում է: Ինչո՞վ ենք ավելի ուժեղ այս հավաքականներից:
Ժամանակին գրանցել ենք արդյունքներ, որոնք ՖԻՖԱ-ն հաշվի առնելով՝ մեզ 102-րդ տեղում է դրել: Բայց ժամանակն անցնում է, և մենք հաստատուն քայլերով մոտենում ենք դասակարգման աղյուսակի ստորին հատվածին: Այս տրամաբանության սկզբունքներով շարժվելու դեպքում հեռու չէ այն օրը, երբ մենք դասակարգման աղյուսակում օբյեկտիվորեն կլինենք 180-րդը:
