«Հոկտեմբերի 27»-ի ահաբեկչության զոհերից Յուրի Բախշյանի այրին՝ Անահիտ Բախշյանը, դեկտեմբերի 17-ին դիմելու է Գլխավոր դատախազություն՝ պահանջով՝ վերացնել «Հոկտեմբերի 27»-ի գործից անջատված մասի կարճման որոշումն ու սկսել նոր քննություն։
Հիշեցնենք, որ Հոկտեմբերի 27-ի գործից մի մասն անջատվել էր 2000 թվականին: Անջատված մասով քննությունը նպատակ ուներ պարզելու՝ արդյոք կայի՞ն հանցագործության այլ մասնակիցներ, դրդիչներ ու հնարավոր կազմակերպիչներ: Սկսած 2000 թվականից՝ անջատված մասի նախաքննության ժամկետը երկարացվել է 25 անգամ, սակայն բացի դատապարտված անձանցից՝ հանցագործության այլ մասնակիցներ, կազմակերպիչներ, կատարողներ, դրդիչներ և օժանդակողներ չեն հայտնաբերվել։ Եվ ի վերջո 2004թ. նոյեմբերի 11-ին Գլխավոր դատախազության կողմից կայացված որոշմամբ անջատված մասով քրեական գործի վարույթը կարճվել է։
Ի դեպ, 2008 թվականին ՀՀ գլխավոր դատախազության տարածած հաղորդագրության համաձայն՝ 2004-ին ՀՀ զինվորական դատախազ Գագիկ Ջհանգիրյանը կողմ է արտահայտվել անջատված մասով գործի քննությունը կարճելուն: Ըստ այդ հաղորդագրության՝ Գագիկ Ջհանգիրյանը կոլեգիայի անդամի կարգավիճակով 2004-ի նոյեմբերի 11-ին քննարկման ժամանակ ելույթ է ունեցել և ընդգծել քրեական գործի վարույթը կարճելու անհրաժեշտությունը՝ նշելով, որ իրականում «Հոկտեմբերի 27-ի» քրեական գործից մաս անջատելու 2000 թվականի հուլիսի 11-ի որոշումը եղել է անօրինական՝ թելադրված քաղաքական իրավիճակով: Ըստ նրա՝ 2000 թվականի հուլիսին 11-ի որոշումը նպատակ է ունեցել հանդարտեցնելու քաղաքական լարվածությունը:
Ուշագրավ է նաև այն, որ անջատված մասով քրեական գործի կարճումից հետո կարճման որոշումը տուժողների իրավահաջորդներից և ոչ մեկին մինչև վերջերս չէր տրամադրվել: Հոկտեմբերի 27-ի զոհերից միայն Յուրի Բախշյանի այրին՝ Անահիտ Բախշյանն է վերջերս դիմել դատախազություն, ստացել կարճման որոշումը և ներկայումս էլ միայնակ՝ առանց մյուս իրավահաջորդների, դիմել է դատախազություն՝ պահանջելով վերացնել կարճման որոշումը և նոր քննություն սկսել:
Անահիտ Բախշյանն «Առաջին լրատվական»-ի հետ զրույցում ասաց, որ չի կարող ասել, թե ինչ հիմքով է դիմել դատախազություն, ինչ նոր երևան եկած հանգամանքներ կան: «Այս պահին ավելի ոչ մի բան չեմ կարող ասել՝ գործի շահերից ելնելով: Մենք բողոք ենք ներկայացրել, և այդ մասին չեմ խոսելու հիմա: Գործի շահերից ելնելով ինձ այս մասին ոչ մի հարց մի ուղղեք: Օրը կգա, և ես բոլորիդ կասեմ այն, ինչ որ պետք է»,-ասաց Բախշյանը:
27-ի զոհերից Արմենակ Արմենակյանի այրին՝ Արմենուհի Արմենակյանն էլ մեզ հետ զրույցում ասաց, որ իրենք էլ են առաջիկայում պատրաստվում դիմել դատախազություն, ստանալ անջատված մասով գործի կարճման որոշումը և նույնկերպ դիմել՝ նոր քննություն սկսելու պահանջով: «Մենք էլ ենք պատրաստվում առաջիկայում դիմել, վերցնել կարճման որոշումը: Անահիտ Բախշյանն ասում էր՝ միասին կդիմենք, բայց քանի որ ինքը միայնակ է դիմել, մենք կտեսնենք, թե ինչ ընթացք է ստանում, և մենք էլ անպայման կդիմենք որոշումը ստանալու համար: Ամեն դեպքում այս նոր սկսվող պրոցեսը շատ դրական եմ գնահատում, և մեծ սպասելիքներ ունենք»,- ասաց տիկին Արմենակյանը:
«Հանրապետություն» կուսակցության քաղխորհրդի անդամ, Հոկտեմբերի 27-ի գործով իրավահաջորդների ներկայացուցիչ Լևոն Եղիազարյանի խոսքով՝ Հոկտեմբերի 27-ի դատավարության ժամանակ երևաց, թե ինչքան բացեր կան, ինչքան հարցերի պատասխաններ տրված չեն: «Պարզված չեն Արմենակ Արմենակյանի սպանության հանգամանքները, Միրոյանի սպանության հանգամանքները: Հարցեր կան Ռոբերտ Քոչարյանի ու Նաիրի Հունանյանի առանձնազրույցի ձայներիզների հետ կապված, այդ ձայներիզները չկան: Շատ հարցեր են բաց մնացել, որոնց բացահայտման դեպքում ամեն ինչ կընկնի իր տեղը»,- «Առաջին լրատվական»-ի հետ զրույցում ասաց Եղիազարյանը՝ հավելելով, սակայն, որ առանձնապես սպասելիքներ չունի, որ ներկայիս դատաիրավական համակարգի պարագայում հնարավոր է նման գործի վերաբացումը և արդարացի քննությունը:
Բացի այդ, Եղիազարյանի խոսքով, իրենք մշտապես պնդել են, որ 27-ի գործի հետևում կա աշխարհաքաղաքական հետք, և նման գործերի վերաբացումը, նոր քննությունը այդքան հեշտ չի լինում. «Ես կարծում եմ, որ ներկայիս դատական համակարգի պայմաններում դժվար կլինի որևէ համոզիչ գործընթաց սկսել: Բացի դրանից, այդ պրոցեսների տակ մենք տեսնում ենք աշխարհաքաղաքական հետք: Հետևաբար գործի վերաբացումը դժվար կլինի, կխոչընդոտեն դրան: Բայց այդ խոչընդոտները մեր իշխանությունների կողմից չեն լինի: Ես համոզված եմ, որ մեր իշխանությունները կուզենան վերաբացել գործը, ես դրանում չեմ կասկածում, բայց այս պայմաններում դրսից ճնշում կլինի, որ առայժմ գործի վերաբացում չլինի: Պրոցեսին անպայման կխանգարեն»,- ասաց Եղիազարյանը:
Եղիազարյանի խոսքով, սակայն, Անահիտ Բախշյանի սկսած պրոցեսը շատ կարևոր է այն առումով, որ եթե անգամ դատախազության կողմից չվերաբացվի էլ այն, ապա գոնե ակնհայտ կլինի, թե չվերաբացելու խոչընդոտները որտեղից են գալիս. «Այսինքն՝ եթե փորձեն բացահայտել գործը, և գտնվեն մարդիկ, քաղաքական ուժեր, որոնք փորձ կանեն խանգարել վերաբացմանը, ապա արդեն մեզ համար հասկանալի կլինի, թե ինչն ինչոց է՝ հետևությունների հանգելու համար: Այսինքն՝ Բախշյանի նախաձեռնությունը կարող է լակմուսի թուղթ լինել իրականությունը բացահայտելու համար, թե՝ որ ուժերն են պրոցեսին խանգարողները: Այս պրոցեսը շատ բան կհանի ջրի երես: Մենք ասել ենք մշտապես, որ 27-ի հետքը գնում է դեպի հյուսիս. այս պրոցեսի արդյունքում պարզ կդառնա, թե այդ հյուսիսը ինչքանով է շահագրգռված այս գործում»,- եզրափակեց Եղիազարյանը:
