Դեկտեմբերի 11-ին կայանալիք Պոլսո Հայոց 85-րդ պատրիարքի ընտրությանն ընդառաջ, դեկտեմբերի 8-ի քվեարկության վերջնական արդյունքներով՝ ձայների մեծամասնությունը ստացել են Սահակ եպիսկոպոս Մաշալյանին ներկայացնող պատվիրակները՝ 9008 քվե։ Իսկ նրա մրցակից Արամ եպիսկոպոս Աթեշյանի պատվիրակները ստացել են 3529 քվե։ Ընտրություններում մեկ պատվիրակ նախընտրել է անկախ մնալ, 753 քվեաթերթիկ ճանաչվել է անվավեր, 376 մարդ դատարկ քվեաթերթիկ է նետել տուփը։
Ըստ լրատվական կայքերի՝ դեկտեմբերի 11-ին կայանալիք Պոլսո Հայոց պատրիարքի ընտրություններում Մաշալյանն ունենալու է 89 աշխարհիկ պատվիրակ, իսկ Աթեշյանը՝ 12։ Այս պատվիրակներին ընտրության օրը կմիանան նախապես ընտրված 17 հոգևոր պատվիրակներ։
Ստամբուլի «Ժամանակ» օրաթերթի գլխավոր խմբագիր Արա Գոչունյանը «Առաջին լրատվական»-ի հետ զրույցում կարծիք հայտնեց, որ Սահակ եպիսկոպոս Մաշալյանի ստացած քվեներն արտացոլում են հայ համայնքի տեսակետը, շատ կարևոր, կենսական նշանակություն ունեն։
«Ով էլ որ հաղթեր այդ ընտրություններում՝ նախընտրելի է, որ հաղթեր ձայների մեծ տարբերությամբ։ Մեր համայնքում ավելի քանի տասներկու տարի պատրիարքի բացակայությունը առաջացրել էր բևեռացումներ, որոնք էլ իրենց հերթին առաջացրել էին ծանր հետևանքներ։ Նոր պատրիարքի ընտրությունը ժողովրդի մեջ միասնականության վերականգնման հույս է արթնացնում։ Եվ ձայների այն մեծամասնությունը, որ ստացել է Սահակ սրբազանը, մեծագույն երաշխիքն է, որ կարողանա վերացնել բևեռացումը և համախմբի ժողովրդին»,- մեզ հետ զրույցում նշեց Արա Գոչունյանը։
Ինչո՞վ է հատկանշական Սահակ եպիսկոպոս Մաշալյանի ընտրությունը։
«Թե՛ Արամ եպիսկոպոս Աթեշյանը, թե՛ Սահակ եպիսկոպոս Մաշալյանը ՆՍՕՏՏ Գարեգին Բ Ամենայն Հայոց կաթողիկոսի գահակալության շրջանում եպիսկոպոս ձեռնադրված մարդիկ են։ Հայ եկեղեցու բոլոր եպիսկոպոսները Մայր Աթոռ Սուրբ Էջմիածնի միաբան են համարվում։ Մենք չենք ուզում խոսել վերացական բաների մասին։ Պատրիարքի գերխնդիրը պետք է լինի հայ ժողովրդի համախմբումը, մյուս բաները երկրորդական են»,- ասաց մեր զրուցակիցը։
Նա կարծում է, որ նորընտիր պատրիարքն ինքը կորոշի իր առաջնահերթությունները, իսկ իրենց մնում է առայժմ զորակցություն հայտնելը։
