Եվրոպայի և Կենտրոնական Ասիայի երկրների շարքում, 2020 թվականի ՀՆԱ-ի աճի կանխատեսմամբ, Համաշխարհային բանկն ամենաբարձր տեմպերն է կանխատեսում երեք երկրներում՝ Ուզբեկստանում, Տաջիկստանում և Հայաստանում։ Սա ինչո՞վ է պայմանավորված․ «Առաջին լրատվական»-ի հարցին ԱԺ տնտեսական հարցերի մշտական հանձնաժողովի նախագահ Բաբկեն Թունյանը պատասխանեց․ «Կանխատեսումները երբեք ֆիքսված չեն մնում, նրանք միշտ վերանայվում են, ու, ըստ այդմ, հասարակության մեջ միշտ հարց է առաջանում՝ եթե դրանք պետք է հաճախակի վերանայվեն, ապա ինչի համար են դրանք ծառայում։ Դրանք ավելի շատ պետք է ուղենիշ ծառայեն։ Համաշխարհային բանկը վերանայել է Հայաստանի ցուցանիշը, որովհետև Հայաստանի տնտեսությունն այս ընթացքում ցույց է տվել, որ այն ավելի բարձր տեմպերով է աճելու, որի պատճառները բազմաթիվ են՝ սկսած կառուցվածքային փոփոխություններից, վերջացրած ստվերի դեմ պայքարից։
Մի շատ կարևոր հանգամանք կա, որի վերաբերյալ այսօր առավոտյան քննարկում ունեինք շատ կոմպետենտ մարդկանց հետ, որոնք նշում էին, որ Հայաստանի տնտեսական աճի պոտենցիալը կես տոկոսով ավելացել է։ Այն պայմանավորված է բնակչության միգրացիայի բարելավման հաշվին։ Այսպես, եթե նախորդ տարիներին 20-40 հազար մարդ ավելի շատ Հայաստանից գնացել է, քան եկել, ապա 2018 և 2019 թվականներին այդ թիվը մոտեցել է զրոյին։ Հետագա տարիներին, եթե ամեն ինչ մեր կանխատեսելով գնա, ապա այդ թիվը կդառնա դրական։ Դա նշանակում է, որ այն պոտենցիալը, որը մեր համար կորսված էր, հիմա կամաց-կամաց սկսում է ավելանալ։ Դրա հետ մեկտեղ պետք է այնպես անել, որ մեր աշխատուժը դառնա ավելի արտադրողական։ Այսինքն՝ մնալով նույն թվաքանակով, կարողանանք ինքներս մեզ ու աշխարհին տալ բարձրարժեք ու բարձրորակ ապրանքներ»։
Մանրամասները՝ տեսանյութում։
