«Տարօրինակ է, որ մի քանի օր առաջ ԱԱԾ նախկին ղեկավար Արթուր Վանեցյանը մոռացել էր այդ պարզ ճշմարտությունը. նրա նախորդ հայտարարությունը շատ երկիմաստ էր, որը տարբեր ձևով կարելի էր մեկնաբանել: Այժմ նա պարզաբանել է»,- «Առաջին լրատվական»-ի հետ զրույցում նշեց քաղաքագետ Արմեն Հովհաննիսյանը՝ անդրադառնալով Վանեցյանի վերջին հայտարարությանը առ այն, որ պետական գաղտնիք հրապարակողը ազգի դավաճան է:
Մեր զրուցակիցը հավելեց, որ այդ կարգի պաշտոն զբաղեցնող մարդը ի պաշտոնե գիտի շատ բան, և դրանց մի մասը ուղղակիորեն կապված է ազգային անվտանգության հետ. «Կան բաներ, որ նա տասնամյակներ, ընդհուպ մինչև մահ երբեք չի կարող հրապարակել: Հիմա Վանեցյանը վերջակետերը դնում է՝ որ օրինականության շրջանակներից և ազգային անվտանգության հանդեպ իր պարտավորությունների շրջանակներից ինքը դուրս չի գալու, ինչը վկայում է այն մասին, որ իր գիտակցության մասնագիտական կողմը զգացմունքայինին այս պահին հաղթել է, և մենք գործ ունենք թեկուզև պաշտոնանկ, բայց պրոֆեսիոնալի հետ»:
Քաղաքագետի խոսքով՝ պարոն Փաշինյանը ամենամեծ վարկանիշ տվողն է Հայաստանում, որովհետև ինքն ունի մեծ ժողովրդականություն. «Վարչապետը կամա թե ակամա իր ողջ թիմին մասամբ վարկավորում է, այդ ժողովրդականության մի մասը տալիս է նրանց, և նրանք դա տարբեր կարգի էֆեկտիվությամբ օգտագործում են: Մեկը բավական արդյունավետ է օգտագործում, ոմանք՝ ոչ. պարոն Վանեցյանը արդյունավետ էր օգտագործում»:
Արմեն Հովհաննիսյանը, սակայն, չի կարծում, որ գաղտնի ոստիկանությունը պետք է ուղղակիորեն խառնվեր տնտեսական, քաղաքական, սոցիալական հարցերին. «Եվ ես միշտ զգուշորեն էի նայում, որ այս ԱԱԾ-պաշտությունը չանցնի ժողովրդական ինչ-որ սահման, որից հետո շատ դժվար կլինի մարդկանց բացատրել, թե ինչ է ազատ հասարակությունը, ազատ հասարակության և իրավական պետության մեջ ապրելը: Ես կարծում եմ, որ ամեն ինչ պետք է վերադառնա ի շրջանս յուր»:
Հարցազրույցն ամբողջությամբ՝ տեսանյութում:
