Հիլթոն հյուրանոցային կայսրության սեփականատեր Բարոն Հիլթոնը մահացավ 91 տարեկանում: Այս մասին Twitter- ում գրել է նրա թոռնուհին՝ դերասանուհի Փերիս Հիլթոնը:
«Նա լեգենդ էր, հեռատես, փայլուն, գեղեցիկ, բարի և ձեռքբերումներով ու արկածներով լի կյանք էր ապրում», – գրել է նա:
Հիլթոնը մահացել է Լոս Անջելեսում գտնվող իր տանը՝ ծերունական մահով, հայտնում է CNN-ը ՝ վկայակոչելով Conrad Hilton Foundation-ին:
Բարոնը «Հիլթոն» հյուրանոցային կայսրության հիմնադիր Քոնրադ Հիլթոնի որդին էր: 1966-ին նա փոխարինեց հորը որպես հյուրանոցային բիզնես խորհրդի նախագահ: 2007-ին Հիլթոնը թոռնուհու՝ Փերիսի հետ կապված մի շարք սկանդալներից հետո, զրկեց նրան ժառանգությունից և ամբողջ հարստությունը թողեց բարեգործական «Քոնրադ Հիլթոն» հիմնադրամին: