Արդյոք Ռ. Քոչարյանին ծննդյան առթիվ Պուտինի շնորհավորանքը քաղաքական ենթատեքստ ունի: «Առաջին լրատվական»-ի հետ այս և մի շարք այլ հարցերի շուրջ զրույցում Երևանի մամուլի ակումբի նախագահ Բորիս Նավասարդյանը նշեց. «Այն փաստը, որ հայաստանյան և ռուսական լրատվամիջոցներում քննարկվում է այդ հարցը, թույլ է տալիս եզրակացնել, որ Ռուսաստանի քաղաքական վերնախավը բոլոր առիթներն օգտագործում է ՀՀ իշխանություններին թուլացնելու համար, ակնհայտ է, որ փորձ է արվում Հայաստանում ազդել հասարակական կարծիքի վրա՝ փոխելով դեպի նեգատիվը իշխանությունների նկատմամբ: Եվ դա պետք է դիտարկել ոչ միայն Քոչարյանի շուրջ զարգացումների համատեքստում, այլ ընդհանրապես հեղափոխությունից հետո: Որքան էլ հայտարարվի, որ փայլուն հարաբերություններ կան Մոսկվայի և Երևանի միջև, որքան էլ հանդիպումների ժամանակ իրար ժպտան Փաշինյանն ու Պուտինը, պարզ է, որ այն, ինչ Հայաստանում կատարվել է անցած տարվա ապրիլ-մայիսին, դժվար թե Ռուսաստանին երջանկացրել է…
Դժգոհություն կա Հայաստանում ընթացող քաղաքական զարգացումների վերաբերյալ, Ռուսաստանի իշխանությունների հասցեին կոմլիմենտներ տարածելով՝ այդ դժգոհությունը չի ստացվելու հաղթահարել, որովհետև խնդիրը և քաղաքական հարցերի վերաբերյալ մոտեցումների տարբերություններն այնքան խորն ու արմատական են, որ դրանք ուղղակի բարի խոսքերով հնարավոր չէ կոմպենսացնել:
Հասարակության մեջ կան զարգացումներ, որոնք նպաստավոր չեն այսօրվա իշխանությունների համար, վարկանիշի անկումն ակնհայտ է, իշխանության ներսում կան որոշակի հակասություններ, այդ ամենը խրախուսում է Ռուսաստանի կողմից այդպիսի հոգեբանական ճնշումները: Մենք պետք է պատրաստ լինենք, որ դրանք ավելի հաճախ են լինելու»:
Անդրադառնալով Արցախում առաջիկայում կայանալիք ՏԻՄ ընտրություններին՝ Բ. Նավասարդյանը կարծիք հայտնեց, որ Հայաստանում տեղի ունեցած հեղափոխությունը չէր կարող ազդեցություն չթողնել Արցախի վրա, և ենթադրվում է, որ Արցախում էլ պետք է որակական փոփոխություններ լինեն. «Տրամաբանական է, որ Արցախի իշխանությունը չի ուզենա, որ այդ փոփոխությունները կատարվեն. այստեղից էլ հակասություններ են առաջացել Հայաստանի և Արցախի իշխող վերնախավի միջև: Քանի դեռ այդ հակասությունները կոմպրոմիսային լուծումներ չեն ստանում, վտանգ կա, որ դրանք սրվելու են»:
Մանրամասն՝ տեսանյութում:
