«Կասկած ունեմ, որ Ազգային ժողովում շատ-շատերը համարում են, որ պետության զավթմանը քաղաքական գնահատական տալը այնքան էլ կարևոր չէ: Խոսքը միայն «Իմ քայլի» մասին չէ, այլև բոլոր 3 խմբակցությունների»,- «Առաջին լրատվական»-ի հետ զրույցում նշեց Ժուռնալիստների «Ասպարեզ» ակումբի հիմնադիր և ղեկավար անդամ Լևոն Բարսեղյանը և, հիշելով «Կտոր մը երկինք» ֆիլմի Թորիկին, ասաց. «Մեջները կրակ չկա, հավես չունեն: Ես մեկ տարի շարունակ դռան նման ճռռացել եմ, վերջին երկու շաբաթը հասկացա, որ պետք է թուլանալ և հաճույք ստանալ»:
Լևոն Բարսեղյանը համոզված է՝ այդ քաղաքական գնահատականը պետք է տրվի, ավելին՝ դա տրվելու է՝ լինի այս Ազգային ժողովը, թե հաջորդ. «Կարծում եմ՝ մեխանիզմը պետք է լինի բաց և շարքով հանրային լսումները, թե մեր անցած այս երրորդ հանրապետության ընթացքում մարդու իրավունքների ինչ զանգվածային և անհատական ոտնահարումներ են եղել: Մարդիկ թող գան և ասեն, որ «Ա1+»-ի եթերազրկման մեջ հսկայական դերակատարություն է ունեցել ոչ միայն տխրահռչակ ՀՌ ապազգային հանձնաժողովը՝ Գրիգոր Ամալյանի գլխավորությամբ, այլև Նախշուն Տավարացյան դատավորը»:
Նրա խոսքով՝ եթե դա արձանագրված լիներ, Դատավորների ժողովը պիտի որ զգուշանար Նախշուն Տավարացյանին առաջ մղել որպես ԲԴԽ անդամ. «Սակայն այս Ազգային ժողովից 97, 98 տոկոսով հույսս կտրել եմ. չլինեն նրանք, կլինի այլ Ազգային ժողով: Ես համոզված եմ՝ առանց այդ քաղաքական գնահատականի Հայաստանում բարեփոխումները արդյունավետ չեն լինելու»:
Իրավապաշտպան Վարդան Հարությունյանն էլ կարծում է, որ դեռ 90 թվականին կար նախկինի քաղաքական գնահատականը տալու կարիքը. «Ես համոզված եմ՝ եթե 90-ականների ամենասկզբին մենք տված լինեինք խորհրդային նախկին իրականության գնահատականը և դրանով գծած լինեինք մի այնպիսի հստակ սահման, որը հնարավորություն չէր տա խորհրդային արատավոր անցյալի թափանցումը մեր ներկա, մենք այսօր կունենայինք բոլորովին այլ իրականություն, մենք այսօր չէինք ունենա այս հեղափոխությունը, որովհետև դրա կարիքը չէր լինի, և այսօր կունենայինք բոլորովին այլ պառլամենտ, որը կկարողանար առաջին հերթին հասկանալ և կարևորել իր սեփական դերը»:
Իսկ թե ինչու այսօրվա Ազգային ժողովը քաղաքական գնահատական չի տալիս, Վարդան Հարությունյանն ասաց. «Որովհետև նրանք գիտեն, որ դրանից հետո հաջորդ քայլը պարտավորությունն է՝ պարտավորություն են ստանձնելու կատարել քայլեր, որոնք պետք է բխեն այդ գնահատականից»:
Հարցազրույցն ամբողջությամբ՝ տեսանյութում:
