ԼՀԿ խմբակցության պատգամավոր Արման Բաբաջանյանը ֆեյսբուքյան իր էջում գրել է․
Լավ լուր Վայոց ձորի մարզի սահմանապահ Խաչիկ գյուղի բնակիչների համար։
2015-ի օգոստոսից Վայոց ձորի մարզի սահմանապահ Խաչիկ գյուղի բնակիչները բողոքում են իրենց համագյուղացիներ Ալվարդ Իսկանդարյանի և Արսեն Մնացականյանի դեմ։ Գյուղ կատարած իմ վերջին այցելության ժամանակ պարզվեց, որ գյուղի խանութն աշխատեցնող ընտանիքի համար գյուղացիներն իրենց անունով միլիոնավոր դրամների հասնող վարկեր են վերցրել։ Այդպես շարունակվել է 17 տարի։
2015-ի օգոստոսին Արսենն ու Ալվարդը հայտարարել են՝ էլ վարկը մարել չեն կարողանում։ Այսպիսով գյուղացիներն իրենց համագյուղացուն օգնելու պատճառով զրկվել են իրենց կարիքների համար նոր վարկային միջոցների դիմելու հնարավորությունից։Շաբաթներ առաջ խնդրին հիմնավոր լուծում գտնելու համար խոսեցի Կենտրոնական բանկի մի պաշտոնյայի հետ։ Պարզվեց, որ վարկային միջոցները տրամադրել են Ֆինկա և Արեգակ վարկային կազմակերպությունները, որոնք, ըստ այսօր ԿԲ-ից ստացած նոր տեղեկության, մասնակի ներել են խաչիկցիների պարտքերը։ Այս պահին իմ ջանքերն ուղղում եմ, որպեսզի նշյալ կազմակերպությունների դիմաց առաջացած պարտքերը ներելուց հետո ԿԲ-ի օգնությամբ հնարավոր լինի մաքրել այս գոյացած պարտքի պատճառով գյուղացիների վարկային վատ պատմությունը և գյուղացիներին հնարավորություն տրվի դիմել տարբեր նշանակության վարկերի։
