ՌԴ դեսպանի «վոյաժները»՝ սպառնալիքի մի ձև. Կոպիրկինը «միամիտ-միամիտ» լյուստրացիա է անում

Հայաստանում Ռուսաստանի դեսպան Սերգեյ Կոպիրկինը, անդրադառնալով իր և մեղադրյալի կարգավիճակ ունեցող Ռոբերտ Քոչարյանի հանդիպմանը, նշել է, որ որևէ վատ բան դրանում չի տեսնում։ Ուշագրավ է, որ դեսպանը նման հայտարարություն է անում անգամ ՀՀ ԱԳՆ կանչվելու, Հայաստանի իշխանությունների անթաքույց դժգոհություններից հետո։ Ի դեպ՝ դեսպանի այս հանդիպումը միակը չէր, և երևի թե պատահական չենք կարող դիտարկել նաև այն փաստը, որ դեսպանը հանդիպումներ է ունենում հիմնականում նախկին քաղաքական համակարգը ներկայացնող, ռևանշիստական ուժերի ու գործիչների հետ։

Ամիսներ առաջ ՀՀ վարչապետ Նիկոլ Փաշինյանը խոսեց քաղաքական դաշտի օտարերկրյա գործակալների մասին՝ այդպես էլ չբացահայտելով նրանց անունները։ Արդյոք դեսպանի այս հանդիպումները կարո՞ղ ենք յուրահատուկ լյուստրացիա համարել։

ԳԽ պատգամավոր Ազատ Արշակյանի կարծիքով՝ վարչապետ Փաշինյանն ամիսներ առաջ քաղաքական շատ լուրջ հայտարարություն է արել՝ Հայաստանում կան այդպիսի ուժեր, և նրանց մի մասը չի ծպտվում: «Դա նույնպես սպառնալիքի մի ձև է։ Ռուսաստանի դեսպանի այդ վոյաժը սպառնալիքի մի ձև է, այո՛, բացահայտում են իրենց ազդեցության ագենտներին, և դա ուժի սպառնալիք է։ Դրանց միջոցով Հայաստանը կարող է ապակայունացվել»,- «Առաջին լրատվական»-ի հետ զրույցում ասաց նա։

Մեր զրուցակիցն ընդգծեց. «Իհարկե, կան նաև չբացահայտված, ռեզերվային ուժեր՝ նրանք, ովքեր սպասում են իրենց պահին ու հրամանին։ Ես ամբողջությամբ համաձայն եմ Նիկոլ Փաշինյանի հետ և հավելեմ՝ մեր պետության, անկախության հակառակորդը իր ազդեցության գործակալներին բացահայտում է, ցուցադրում իր մկանները։ Դա հիմարություն չէ, թյուրիմացություն չէ, վրիպակ չէ դեսպանատան արածը՝ նրանք մեզ սպառնում են, ասում են՝ այսպիսի ուժեր ունենք, նրանց կմոբիլիզացնենք ու երկիրը կապակայունացնենք»։

Ըստ Արշակյանի՝ մկանների ցուցադրման բացահայտում է, և եթե չլինի այդ բացահայտումը, մենք չենք իմանա՝ ինչ ուժեր ունենք. «Իրենց կարծիքով՝ դրանք ազդեցիկ ուժեր են, բայց իմ կարծիքով՝ ազդեցիկ չեն, մարգինալ են, բայց անհոգի, անարժեք, արժեքային համակարգ չունեցող, ամեն ինչի պատրաստ վարձկաններ են։ Սրանք պատրաստ են ամեն ինչի, կանեն ամեն ինչ, ոչինչ նրանց չի կարող զսպել՝ ո՛չ դավանանքը, ո՛չ կրոնը, ո՛չ մարդու իրավունքը, ո՛չ ազգակցական, ո՛չ հայրենակցական կապը։ Մենք ունենք վարձկաններ, որ ամեն ինչ կարող են Հայաստանում անել, Հայաստանի ու ՀՀ քաղաքացիների հետ։ Իհարկե սա լյուստրացիա է, լյուստրացիա՝ նպատակով, մեզ սպառնում են»։

Քաղաքագետ Լևոն Շիրինյանի կարծիքով՝ եթե ՌԴ դեսպանն այդ հանդիպումներում խնդիր չի տեսնում, մենք տեսնում ենք: «Իրենք չեն կարողանում հիշել, որ Հայաստանն անկախ պետություն է՝ իրենցից առաջ, իրենց հետ և իրենցից հետո։ Ես այդ հանդիպումներում տեսնում եմ քրեական տարրերի, գողապետության պարագլուխներին խրախուսելու փորձ, լյութոկրատիայի խրախուսման փորձ»,- «Առաջին լրատվական»-ի հետ զրույցում ասաց նա։

Մեր զրուցակցի կարծիքով՝ ՌԴ դեսպանը գնում է «իր մարդկանց մոտ». «Նա քաղաքական լյուստրացիա է անում՝ միամիտ-միամիտ։ Բայց կա նաև երկրորդ մասը՝ տեսնելով, որ ժողովրդի կողմից այդ հանդիպումներն աջակցություն չունեն, ստիպված հայտարարեց, որ դրանց մեջ ոչ մի վատ բան չկա»։

Մյուս կողմից, ըստ Շիրինյանի, պետք է դիտարկել այդ հանդիպումների դրական կողմը: «Մենք չարչարվում ենք, խոսում ենք լյուստրացիայի անհրաժեշտության մասին, իսկ նա դա անում է առանց որևէ խնդրի։ Կա նաև մնացած մասը, Քոչարյանը կրակած փամփուշտ է, իսկ մնացա՞ծը»,- եզրափակեց նա։

Լուսանկարը՝ Armeniasputnik-ի