Ինչպես հայտնի է` Արարատում ՀՀԿ կառույցի ղեկավար է դարձել Հովիկ Աբրահամյանի ազգական, ԱԺ ՀՀԿ-ական պատգամավոր, նախկին ուսուցչուհի Կարինե Պողոսյանը: Սա նաև նշանակում է, որ մարզի ՀՀԿ կառույցը դե ֆակտո ղեկավարելու է ԱԺ նախագահ Հովիկ Աբրահամյանը:
2012 թվականին, չնայած ՀՀԿ-ական մարզպետի ու ՀՀԿ-ական քաղաքապետի առկայությանը, ԲՀԿ-ն ավելի շատ ձայներ հավաքեց խորհրդարանական ընտրություններում: Սա էր, թերևս, պատճառը, որ մինչ Արարատի քաղաքապետի ընտրական գործընթացը կսկսվեր, ՀՀԿ-ական մարզպետ Էդիկ Բարսեղյանը հրաժարական տվեց, և ՀՀԿ-ի հաղթանակը Արարատում վստահվեց Գրիգորյան եղբայրներին` ԱԺ անկուսակցական պատգամավոր, «Ավշարի» գինու գործարանի սեփականատեր Արայիկ Գրիգորյանին ու Արարատի մարզպետ դարձած նախկին դաշնակցական Արամայիս Գրիգորյանին:
Արարատից ընտրված պատգամավոր Արայիկ Գրիգորյանից «Առաջին լրատվական»-ը հետաքրքրվեց, թե ՀՀԿ-ն նոր ղեկավարով կարո՞ղ է հաղթել Արարատում: «Ավելի ուժեղ կլինի, ավելի ուժեղ կլինի Հանրապետականը»,- վստահեցրեց Գրիգորյանը: Մեր հարցին` ավելի ուժեղ կլինի, քան նախկինո՞ւմ էր, պատգամավորը հակադարձեց. «Ինչի եք ինձ սադրիչ հարցեր տալիս: Ես կապ չունեմ էդ ամեն ինչի հետ: Ընտրությունները եղել են, ես պատասխանատու եմ եղել, այո: Հետո նորից ես եմ լինելու: Ձեր հարցերը գրավոր ուղարկեք, կպատասխանեմ»:
Լուսանկարը` PanARMENIAN Photo-ի
