Իրանի ղեկավարի և հոգևոր առաջնորդի գլխավոր ռազմական խորհրդական Յահյա Ռահիմ Սաֆավիի խոսքերով, Իրանի և ԱՄՆ միջև Պարսից ծոցում ցանկացած բախում կհանգեցնի նավթի բարելի դիմաց 100 դոլարից բարձր գնաճի:
«Ամերիկացիները լիովին գիտակցում են, որ իրենց զինված ուժերը գտնվում են Իրանի հրթիռային խոցելության դաշտում, և Պարսից ծոցում գտնվող բոլոր ամերիկյան և օտարերկրյա ռազմածովային ուժերը գտնվում են Իսլամական հեղափոխության պահապանների կորպուսի «երկիր-ծով» դասի հրթիռների հասանելիության սահմաններում»,- խորհրդականի խոսքերը մեջբերում է Fars գործակալությունը:
«Պարսից ծոցում արձակված առաջին գնդակը նավթի գները կհասցնի բարելի դիմաց ավելի քան 100 դոլարի մակարդակի: Դա անտանելի կլինի Ամերիկայի, Եվրոպայի և ԱՄՆ դաշնակիցների համար, ինչպիսիք են Ճապոնիան և Հարավային Կորեան»,- ասել է Սաֆավին: