Սիրիական ճգնաժամը կարող է շարունակվել ևս 10 տարի, եթե երկրի գործող նախագահ Բաշար Ասադին աջակցեն Իրանն ու Ռուսաստանը, իսկ ծայրահեղական խմբավորումները լիովին վերահսկեն «ռազմի դաշտը»: Այս մասին գրում է al-Arabiya հրատարակությունը՝ հղում անելով փորձագետներին:
Մասնագետների կարծիքով՝ Սիրիայի նախագահը գիտակցաբար ընտրել է այնպիսի խմբավորումների, ինչպիսիք են՝ «Ֆրոնտ ան-Նուստրա»-ն և «Իրաքի և Լևանտեի Իսլամական պետություն»-ը, ստեղծմանը և գործունեությանը չխոչընդոտելու ռազմավարությունը, որոնք փոխարինում են չափավոր ընդդիմությանը և երկու ճակատով են կռվում: Ժողովրդավարության պաշտպանության հիմնադրամի փորձագետ և վերլուծաբան Դևիդ Գարտեյնշտեյն-Ռոսսի խոսքով՝ հիմա Ասադի ընկնելն անխուսափելի չէ, մինչդեռ դեռ մեկ տարի առաջ շատերին այդպիսին էր թվում:
Գարտեյնշտեյն-Ռոսսը նշել է, որ Ասադն իր դիրքերն ամրապնդել է Թեհրանի և Մոսկվայի զենքի մատակարարաման և ֆինանսական օգնության շնորհիվ, նաև որովհետև Ժնևում խաղաղ բանակցություններն ԱՄՆ-ի և ՌԴ-ի օժանդակությամբ տապալվել են: Բացի դրանից՝ Ասադի օգտին են նաև ծայրահեղական խմբավորումները, որոնց դեմ պայքարելու համար նա ոչինչ չի անում: Նրանց ամրապնդվելն ու ընդդիմության շարքերում առաջին դերում լինելն արևմտյան երկրներին ավելի է համոզում չմիջամտել: Ըստ փորձագետի՝ այն, որ Վաշինգտոնը մինչև հիմա Սիրիայի ընդդիմոթյանը ծանր զինամթերք չի մատակարարում և միայն հումանիտար օգնություն է ցուցաբերում, ոչ միանշանակ է և նվազեցնում է «պատերազմին վերջ տալու անկեղծ ցանկությունը»:
