Խ.Աբովյանի անվան Հայկական պետական մանկավարժական համալսարանում տեղի ունեցավ Հայաստանի մանկավարժական բուհերի կոնսորցիումի հերթական նիստը՝ կոնսորցիումի հոգաբարձուների խորհրդի նախագահ, ՀՊՄՀ ռեկտոր Ռուբեն Միրզախանյանի նախագահությամբ: Կոնսորցիումի նիստին մասնակցում էին Գյումրիի պետական մանկավարժական ինստիտուտի ռեկտոր Վարդևան Գրիգորյանը, Վանաձորի պետական մանկավարժական ինստիտուտի ռեկտոր Գուրգեն Խաչատրյանը, Գավառի պետական համալսարանի ռեկտոր Ռուզաննա Հակոբյանը, Գորիսի պետական համալսարանի ռեկտոր Յուրի Սաֆարյանը, Ֆիզիկական կուլտուրայի հայկական պետական ինստիտուտի պրոռեկտոր Ֆրունզ Ղազարյանը և Արցախի պետական համալսարանի պրոռեկտոր Վահրամ Բալայանը:
Արցախի պետական համալսարանն այս նիստի ընթացքում դարձավ Հայաստանի մանկավարժական ԲՈՒՀ-երի կոնսորցիումի անդամ:
Նիստում քննարկվեցին Միջբուհական կոնսորցիում հիմնադրամի կարգավիճակը, կանոնադրությունից բխող գործառույթները, նպատակներն ու հեռանկարային զարգացումը: Կոնսորցիումի զարգացմանը վերաբերող հարցերը ներկայացրեց հոգաբարձուների խորհրդի նախագահ Ռուբեն Միրզախանյանը: Քննարկվեցին նաև միջբուհական կոնսորցիումի համալսարանների կարգավիճակի բարձրացման և միջազգային չափանիշներին համապատասխանեցման վերաբերյալ ՀՀ կառավարությանը ներկայացված առաջարկություններից բխող գործունեության և ժամանակացույցին վերաբերող հարցեր: Հիմնադրամի տնօրեն ընտրվեց հոգեբանական գիտությունների դոկտոր, պրոֆեսոր Նաիրա Հոկոբյանը:
2 ժամ տևած նիստից հետո Կոնսորցիումի անդամները մեկնեցին Մայր Աթոռ Սուրբ Էջմիածին, որտեղ նրանց ընդունեց Ամենայն Հայոց կաթողիկոս, Ն.Ս.Օ.Տ.Տ. Գարեգին Երկրորդը: Վեհափառը կարևորեց մանկավարժական բուհերի գործունեությունը ապագա սերնդի դաստիարակության գործում, և ընդգծեց հայ առաքելական եկեղեցու պատմության դասավանդման անհրաժեշտությունը: Պայմանավորվածություն ձեռք բերվեց ստեղծել աշխատանքային խումբ, որը կմշակի մանկավարժական համալսարաններում Հայ առաքելական եկեղեցու պատմության դասավանդման ուսումնական ծրագիր: Դրանով կառաջնորդվեն կոնսորցիումի անդամ բոլոր բուհերը:
Ռուբեն Միրզախանյանը կոնսորցիումի անունից Ամենայն Հայոց Կաթողիկոսին նվիրեց «Բարոյախոսություն ըստ Անուշի» գոբելեն աշխատանքը, որի վրա հեղինակը` ՀՊՄՀ դիզայնի և դեկորատիվ կիրառական արվեստի ամբիոնի վարիչ, մանկավարժական գիտությունների դոկտոր, պրոֆեսոր Անուշ Եղիազարյանը, աշխատել էր ավելի քան 10 տարի:
