Աբխազիայում թմրամիջոցների ապօրինի շրջանառության համար մահապատիժ կամ ցմահ բանտարկություն է սահմանվում։ Դա արվում է թմրամոլության պատճառով մահացության բարձր մակարդակի նվազեցման համար: Այս մասին հայտարարել է հանրապետության խորհրդարանի պատգամավոր Դմիտրի Դբարը, հաղորդում է TASS-ը:
«Այսպես կոչված թմրադիլերների մեծ ներհոսքը Աբխազիա, հիմնականում, Ռուսաստանից է գալիս, և մենք արդեն ստիպված ենք նման կոշտ միջոցներ ձեռնարկել», – ընդգծել է Դբարը:
Նրա խոսքերով՝ վերջին վեց տարվա ընթացքում երկիրը «լցվել է թմրամիջոցներով», ինչի հետևանքով մահացությունն ավելացել է 20-30 տոկոսով: Բացի դրանից, արգելված նյութերի ձեռքբերման ուղիների մասին տեղեկություններ են տարածվում սոցիալական ցանցերում:
Ներքին գործերի նախարարության տվյալներով՝ 2018 թվականին Աբխազիայում թմրաբիզնեսի հետ կապված 224 հանցագործություն է բացահայտվել, ինչը 31-ով ավելի է 2017-ի համեմատ:
Ապրիլի 4-ին Աբխազիայի խորհրդարանի պատգամավորները թմրամիջոցների ապօրինի շրջանառության համար խստացնող պատժամիջոցների վերաբերյալ փոփոխություններ կատարեցին հանրապետության քրեական և քրեական դատավարության օրենսգրքերում: Մասնավորապես, խոշոր չափերով թմրամիջոցների ապօրինի ներկրման և արտահանման համար խախտողներին սպասվում է ցմահ ազատազրկում կամ մահապատիժ: Թարմացված օրենքը ուժի մեջ կմտնի 2020 թվականի հունվարի 1-ից:
