«Առաջին լրատվական»-ի հետ զրույցում անդրադառնալով Մեղրիի զորամասում տեղի ունեցած միջադեպին, որը հանրային քննարկման և մեծ աղմուկի պատճառ դարձավ, «Ազգային օրակարգ» կուսակցության հիմնադիր հանձնախմբի քարտուղար Արա Գասպարյանն ընդգծեց. «Նախաքննությունը պետք է պատասխանի որոշ հարցերի, հանրության համար պետք է պարզվի՝ դա դրսից կազմակերպված է եղել և փորձ է արվել բանակի կազմաքանդման մոդել աշխատեցնել, թե ներքին կարգապահական խնդիրներ են եղել… Չի կարելի թույլ տալ, որ էյֆորիկ տրամադրությունները, քաղաքացիական ընդվզման տրամադրությունները, որ նորմալ են հանրության մեջ, տեղափոխվեն բանակ: Բանակը հիերարխիկ կառույց է, և մենք հիբրիդային պատերազմի մեջ ենք, չպետք է թույլ տալ որևէ ձևով բանակը ներքաշել ներքաղաքական գործընթացների մեջ կամ բանակը տարբեր տեսակի քննարկումների հարթակի վերածել»:
Յուրաքանչյուր պետության ազգային անվտանգության լրջագույն սպառնալիքներից մեկն էլ քրեածին ակտիվության աճն է: Վերջին շրջանում հասարակության տարբեր շերտեր խոսում են այն մասին, որ մեր երկրում հանցագործությունների թվի աճ է նկատվում: Ա. Գասպարյանի կարծիքով՝ անհանգստանալու պատճառներ իրոք կան. «Ըստ ոստիկանության հրապարակած թվերի՝ հանցագործությունների թիվը 2018-ին՝ 2017-ի համեմատությամբ, աճել է 11 տոկոսով, աճել է հանցավորության գործակիցը: Այսինքն՝ պետության քրեական քաղաքականությունը պետք է բարելավվի, չպետք է թույլ տալ, որ առաջանա ամենաթողության և անպատժելիության մթնոլորտ: Պետության քրեական քաղաքականության նպատակը պետք է լինի համակողմանի, օբյեկտիվ նախաքննության և հետաքննության իրականացումը՝ բոլոր բաղադրիչների միջև անխափան փոխգործակցությամբ: Այս ոլորտում կան խնդիրներ՝ կապված որակյալ, փորձառու կադրերի, նոր մեթոդների ու տեխնիկական միջոցների կիրառման հետ… Անհրաժեշտ է բարելավել քրեադատավարական ընթացակագրերը:
Հանցավորության դեմ պայքարը միայն իրավապահ մարմինների միջոցով չի իրականացվում: Հանցագործությունների թվի աճը պայմանավորված է քրեական ենթամշակույթի արմատավորմամբ: Հանցավորության նվազեցման հարցում շատ կարևոր է կրթական համակարգի, ընտանիքի դերը, ինչպես նաև մեդիայի միջոցով տարածվող արքետիպերի դերը: Պետությունը պետք է հստակ քաղաքականություն վարի, շատ կարևոր է ռազմահայրենասիրական դաստիարակությունը»:
Մեր զրուցակիցը նաև ընդգծեց, որ իրավապահ մարմինները չպետք է դառնան գործիք ներքաղաքական հաշվեհարդարի համար:
Մանրամասն՝ տեսանյութում:
