Այսօր՝ մարտի 6-ին, ԱԺ-Կառավարություն հարցուպատասխանի ժամանակ «Լուսավոր Հայաստան» խմբակցության պատգամավոր Արման Բաբաջանյանի հարցն ուղղված էր վարչապետ Նիկոլ Փաշինյանին:
«Թավշյա հեղափոխությունը դաշինք էր Հայաստանի աղքատ և ունեզրկված քաղաքացիների հետ հին Հայաստանի հոռի բարքերը մերժելու շուրջ: Անցած 10 ամիսներին մեր քաղաքացիները սպասում էին, որ նախկին իշխանության հետ ասոցացվող օլիգարխների, պաշտոնյաների ավելի լայն շրջանակ պիտի կանչվեր պատասխանատվության, մինչդեռ պատկան մարմինները մինչ օրս կոնկրետ մի քանի անուն են շրջանառում»,- ասաց պատգամավորը:
Նրա խոսքով՝ տեղի են ունեցել մի քանի դեպքեր, երբ Ռոբերտ Քոչարյանի կամ Սերժ Սարգսյանի իշխանությունների հետ ասոցացված այս կամ այն անհատը, պետությանը վճարելով կամայական ինչ-որ գումար, ազատվել է պատասխանատվությունից. «Նշված գործընթացը տեղի է ունեցել արտադատարանական կերպով՝ առանց թափանցիկության սկզբունքների պահպանման: Ինչո՞ւ են մինչ օրս տեղի ունեցած դեպքերը կատարվել ոչ հրապարակային: Ինչո՞ւ են հանրությունից գաղտնի պահվում, ասենք, Մաքսային պետական կոմիտեի նախկին պետ Արմեն Ավետիսյանի՝ պետությանը հյուրանոց նվիրաբերելու կամ միայն հյուրանոց նվիրաբերելու դրդապատճառները: Ո՞վ կամ ինչի՞ հիման վրա է որոշել, որ նա հյուրանոց նվիրաբերելով՝ կարող է ազատվել պատասխանատվությունից»:
Նա անդրադարձավ նաև Սաշիկ Սարգսյանի նվիրաբերած 18,5 կամ 30 մլն դոլարի նվիրաբերությանը. «Ո՞վ է որոշել, որ Սերժ Սարգսյանի եղբայր Սաշիկ Սարգսյանը պետք է հանգիստը վայելի Իսպանիայում՝ պետությանը նվիրաբերելով 18,5 կամ 30 մլն դոլար»:
Ի պատասխան՝ վարչապետն ասաց, որ իրեն հայտնի չէ դեպք, որ ինչ-որ մեկը վճարում է կատարել և ազատվել է պատասխանատվությունից. «Բացառվում է, որ կուլիսային ինչ-որ դեպքեր տեղի ունենան»:
Մանրամասները՝ տեսանյութում:
