Վարչապետ Նիկոլ Փաշինյանը հետաքրքիր զուգահեռներ է անցկացրել մեր ժամանակների և Պապ թագավորի ժամանակաշրջանի միջև՝ ասելով, որ ավանդական մտածողության մեջ Պապ թագավորը համարվում է Հայ առաքելական եկեղեցու թշնամիներից, մինչդեռ հենց նրա շնորհիվ մենք այսօր ունենք Հայ առաքելական եկեղեցի: Անդրադառնալով այս դիտարկմանը՝ «Առաջին լրատվական»- ի հետ զրույցում Հայ առաքելական եկեղեցու Շիրակի թեմի առաջնորդ Տեր Միքայել եպիսկոպոս Աջապահյանը կարծիք հայտնեց, որ համեմատությունն այնքան էլ տեղին չէ. «Պապ թագավորից մեզ բաժանում է ավելի քան 16 դար, հետևաբար Պապ թագավորի և այսօրվա համեմատությունը, չեմ կարծում, թե տեղին է… Այդ դարերի ընթացքում շատ և շատ ուրիշ դեպքեր, հարաբերություններ և խնդիրներ են եղել, որոնք կարող էին փոխած լինել եկեղեցի – պետություն հարաբերությունների դիմագիծը: Երկրորդ՝ ես այդ հաստատումը չեմ ընդունում, թե Պապ թագավորը հայ եկեղեցու մեծագույն թշնամի է… »:
Պատմագետները մի օրինաչափություն են արձանագրում, որ Առաքելական եկեղեցու դերն ուժեղանում էր երկրի ինքնիշխանության անկմամբ… Եվ թարմ օրինակ է բերվում` Հայ առաքելական եկեղեցաշինության վերջին բուռն փուլը համընկավ այն ժամանակների հետ, երբ պետական իշխանությունը յուրացվեց քրեաօլիգարխիկ շրջանակների կողմից: Անդրադառնալով այս դիտարկմանը՝ Տեր Միքայել եպիսկոպոս Աջապահյանը նշեց. «Հայաստանում բուռն եկեղեցաշինություն գոյություն չունի, դա միֆ է, որ հայտնի չէ, ինչ նպատակով է ասպարեզ նետվում… Եթե անգամ լիներ բուռն եկեղեցաշինություն, դրանից չէ, որ պիտի սրվեր պետություն -եկեղեցի հարաբերությունը, բուռն եկեղեցաշինությունը ինչո՞վ է սպառնում հայկական պետականությանը:
Եկեղեցու գործունեությունը կարող է համընկնել տարբեր իշխանությունների ժամանակաշրջանի հետ, մենք մեր գործն ենք անում, և քրեաօլիգարխիկ իշխանության պայմաններում էլ ենք իրականացնում եկեղեցաշինություն, ոչ քրեաօլիգարխիկ իշխանության պայմաններում էլ. դա մեր առաքելությունն է: Բայց եկեղեցաշինություն պետականաշինության հաշվին չի եղել, չկա և չի լինելու…
Երբ քրեօլիգարխիկ համակարգն էր իշխում (որի դեմ հաճախ խոսում էինք), բա ո՞ւմ հետ պիտի համագործակցեինք՝ Էրդողանի՞, թե՞ Ալիևի: Շատ անբնական կլիներ, եթե եկեղեցին չհամագործակցեր քրեաօլիգարխիկ համակարգի հետ»:
Տեր Միքայել եպիսկոպոս Աջապահյանի հավաստմամբ՝ իշխանափոխության հետ կապված՝ ճգնաժամ չի առաջացել պետություն – եկեղեցի հարաբերություններում. «Ճգնաժամը ոմանց ուղեղներում է: Եկեղեցին շարունակում է իր առաքելությունը»:
Մանրամասն՝ տեսանյութում: