«Առաջին լրատվական»-ի զրուցակիցն է ԱԻՄ առաջնորդ Պարույր Հայրիկյանը։
-Պարոն Հայրիկյան, դուք նախաձեռնել էիք Սահմանադրությունը փոխելու գործընթաց, այժմ այդ օրակարգով մի քանի կուսակցություններ համագործակցում են։ Դուք մասնակցո՞ւմ եք այդ քննարկումներին։
–Իսկապես, տարբեր ուժերի կողմից զուգահեռ աշխատանքներ են տարվում։ Որքան հնարավոր է՝ մենք փորձում ենք համաձայնության գալ։ Այսինքն՝ և՛ նոր նախաձեռնություններին ենք մասնակցում, և՛ մեր հին գործընթացն ենք առաջ տանում։ Ընթացքում որոշ դժվարություններ են առաջացել։ Եթե նախկինում մենք ուղղակի գիտեինք, որ ստորագրություն պետք է հավաքվի, հիմա նաև այսպիսի խնդիր է դրված. ստորագրություն հավաքելուն զուգահեռ սահմանված են կանոններ, որոնք գործնականում անհնարին են դարձնում ստորագրահավաքը, այսինքն՝ քաղաքացու տուն չես գնում ստորագրության համար։ Նաև այդ հարցերն են քննարկվում հիմա։ Այսինքն՝ գործը հիմա տարբեր ուղղություններով նախապատրաստական փուլում է։
Մենք գրեթե բոլորին էլ մասնակցում ենք, այսինքն՝ այդքան շատ չէ՝ երկու հիմնական, երրորդը ձախողվեց։ Իմ մոտեցումը հստակ է, ես ձևականություններով չեմ ուզում զբաղվել։ Դեռևս տաս տարի առաջ վեց կուսակցություն համաձայնության է եկել, ինչո՞ւ պետք է զրոյից սկսենք։ Ինձ համար անընդունելի է նաև այն մոտեցումը, որն առաջարկվում է որոշ ուժերի կողմից՝ Սահմանադիր ժողով հրավիրենք, համաձայնության գանք, որովհետև ես չեմ ուզում նույնիսկ անցանկալի Սահմանադրության բոլոր նրբերանգները չեղարկել։
-Ձեր առաջարկն ու պահանջը հիմա կոնկրետ ո՞րն է։
-Իմ անձնական մոտեցումը հետևյալն է. եթե նախկինում եղել է վեց կուսակցությունների համաձայնությամբ Սահմանադրության համար կարևոր խնդիրների ամրագրում, ինչո՞ւ հիմա պետք է զրոյից սկսենք։ Այդ կուսակցությունները լուրջ աշխատանք էին տարել՝ և՛ Ազգային ժողով էին տվել, և՛ նախագահին։ Դա պետք է որպես հիմք ընդունել, որովհետև այնտեղ կարևոր սկզբունք կա՝ քաղաքացիների իրավունքների առավելագույն ընդլայնում, քաղաքացիներին պետք է երկրի տերը դարձնել։ Բայց, որպեսզի դիմացիններս իրենց վատ չզգան, նոր գործընկերներ են՝ համբերատարությամբ ենք լցվում, ասում ենք՝ ուսումնասիրեք, տեսեք՝ ինչ դիտողություններ ունեք։ Մենք ունենք բացարձակ ժողովրդավարության Սահմանադրություն, մնացած բոլորը, եթե ազնիվ են՝ պետք է գան հանգեն դրան, դրանից այն կողմ մարդկությանը հայտնի չէ։ Մի հոգեբանական խնդիր կա՝ մարդկանց օգնել, որ իրենց ներքին անվստահությունն ու բարդույթները հաղթահարեն, հասկանան, որ սա գոնե երկու սերնդի տևական աշխատանքների արդյունք է ու եթե ունենան՝ դրա հիման վրա առաջարկներ ներկայացնեն։ Իրենք ասում են՝ հավաքվենք, գրենք, հետո մասնագետներին տանք, մասնագետներն իրենց կարծիքն ասեն՝ դա մանկապարտեզ է։ Բարի ցանկություն է, բայց մանկապարտեզ։
-Այդ առաջարկությունները պատրաստվո՞ւմ եք ներկայացնել իշխանություններին։
-Իմ մոտեցման մասին ասեմ։ Երբ նախնական համաձայնության կգանք, նորից կդիմենք Նիկոլ Փաշինյանին։ Երկու անգամ դիմել ենք՝ որպես ԱԻՄ, հիմա այս նոր կուսակցություններով միասնական դիմենք։ Եթե Նիկոլ Փաշինյանը ընդառաջ է գալիս, իր մեղքերը քավում՝ շատ լավ, թող մտնի խորհրդարան։ Մենք նաև Էդմոն Մարուքյանին կդիմենք, քանի որ խորհրդարանում է նաև Ծառուկյանի խմբակցությունը, Հանրապետականին, Դաշնակցությանը՝ բոլորին ենք դիմելու։ Անձամբ ես կդիմեմ որպես նախաձեռնության հեղինակ։
-Դուք ևս առաջարկում եք վերացնել սուպերվարչապետական համակարգը, օրինակ՝ ԼՀԿ-ն այդ խնդրի մասին պարբերաբար բարձրաձայնում է։
-Իրենք մասնավոր ինչ-որ բանի մասին են խոսում, մենք՝ ոչ, խնդրին գլոբալ ենք նայում։ Մենք ուզում ենք, որ քաղաքացու իրավունքներն ամրագրվեն։
Լուսանկարը՝ Armeniasputnik-ի
