Ազգային ժողովն առաջիկայում կքննարկի կառավարության կառուցվածքի և գործունեության մասին օրենքի նախագիծը, որով նախատեսվում է արմատապես փոփոխել կառավարության կառուցվածքը և կրճատել նախարարությունների թիվը: Վարչապետ Նիկոլ Փաշինյանը կառավարության նիստի մեկնարկին նշեց, որ նախարարությունների թիվը կրճատվելու է, բայց քանի դեռ քննարկվում են կառավարության կառուցվածքի փոփոխությունները, որոշ գերատեսչությունների ղեկավարներ չեն նշանակվի: «Առաջին լրատվական»- ի հետ զրույցում «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը նշեց. «Երբ ասում են, որ քննարկվում են կառավարության կառուցվածքի մասին օրենքի փոփոխությունները, ակամայից հարց է առաջանում՝ ով և որտեղ: Միայն կառավարությունում, փակ դռների ետևում քննարկումը վատ գաղափար է, նաև լայն հանրային քննարկումներ պետք է լինեն, որոնց ընթացքում քիչ թե շատ պրոֆեսիոնալ փորձագետները կկարողանան իրենց կարծիքն արտահայտել: Անգամ նախագիծը չենք տեսել: Անընդունելի է աշխատանքի այս գաղտնի ռեժիմը»: Իոաննիսյանի դիտարկմամբ՝ միգուցե հրապարակային քննարկման դեպքում բողոքներ կլինեն և այդ պատճառով կառավարությունը չի գնում հանրային և հրապարակային քննարկումների, բայց սա արդարացում չէ:
Քաղաքագետ Հայկ Սահակյանը նշեց, որ հասարակությունը նման որոշումներից միշտ կտրված է եղել, և դա լուրջ բողոքի առիթներ է ստեղծել: «Ամեն ինչ իմացել ենք պոստ ֆակտում, մինչդեռ սպառողը մենք ենք, և նախևառաջ մեզ պետք է հարցնեին դա պետք էր անել, թե ոչ»,- նշեց Հ. Սահակյանը՝ հավելելով, որ հայտնի չէ, թե ինչ սկզբունքներով են առաջնորդվել կառավարության կառուցվածքում նման փոփոխություններ նախաձեռնելիս, բացի դրանից՝ մարդկանց հենց այնպես գործազուրկ դարձնելը լուրջ չէ: Քաղաքագետը կարևորեց, որ անհրաժեշտ է լայն քննարկում կազմակերպել, լսել հանրության կարծիքը, հետո նոր որոշում կայացնել:
Մանրամասն՝ տեսանյութում:
