Թուրքիային անհրաժեշտ են արտաքին շուկաներ, հակառակ դեպքում նրան սպասում է բնակչության կենսամակարդակի խիստ նվազում: ԵՄ-ին անդամակցելու նախագիծը ձախողվել է, ինչը նշանակում է, որ վաղ թե ուշ ԵՄ շուկաները կփակվեն Թուրքիայի համար: Ձախողվել է նաև «նոր Օսմանական կայսրության» նախագիծը: Մնում է միայն Մաքսային միությունը: Այս մասին REGNUM-ին տված հարցազրույցի ժամանակ հայտարարել է տնտեսագետ, «Նեկոնո» խորհրդատվական ընկերության փորձագետ Միխայիլ Խազինը:
Միաժամանակ նա նշել է, որ ներկայումս Թուրքիա-ՄՄ փոխհարաբերությունների ձևաչափը դեռևս պարզ չէ, հետևաբար այժմ կարելի է խոսել միայն միտումների մասին: Խազինի կարծիքով՝ ՄՄ-ի և Թուրքիայի մերձեցման մեջ հետաքրքրված են այս գործընթացի բոլոր մասնակիցները:
«Սա հենց այն դեպքն է, երբ համագործակցության զարգացումը մասնակիցներից ոչ մեկին չի վնասի: Մեկ այլ հարց է, որ այն պետք է հիմնավոր կերպով մշակել, ինչը դեռևս բարդ է: Նման մերձեցումը երկարաժամկետ գործընթաց է, այլ ոչ թե որևէ հստակ անձանց արագ որոշում»,- հայտարարել է նա:
Այն հարցին՝ արդյոք Թուրքիա-ՄՄ ինտեգրման գաղափարի առաջխաղացումը չի՞ կարող հանգեցնել Բրյուսելի կողմից ըմբռնման և բարիության «հանկարծակի» աճի Անկարայի հանդեպ՝ հաշվի առնելով, որ անցած տարի այս ուղղությամբ որոշակի շարժեր եղել են, Խազինը բավականին սկեպտիկորեն է պատասխանել. «Քաղաքական հայտարարություններ հաստատ կլինեն, սակայն իրականում ոչ մի արդյունք չի կարող լինել: Եվրամիությունը գտնվում է ճգնաժամի և դեգրադացման վիճակում, նա հետագա զարգացման հնարավորություններ չունի: Եվ այսօր նա չի կարող առաջարկել որևէ վառ և բարդ որոշում, միայն փուչ հայտարարություններ: Առավել ևս, որ էկոնոմիկայի առումով Մաքսային միության բոլոր գործող մասնակիցները «կողմ են» Թուրքիայի հետ մերձեցմանը»:
Խազինը չի բացառել, որ քաղաքական հարթությունում ամեն ինչ այդքան հարթ չի լինի, ինչպես էկոնոմիկայում:
«Նեկոնո» խորհրդատվական ընկերության փորձագետն անդրադարձել է նաև հարցի «հայկական» կողմին, իսկ ավելի հստակ՝ երկու գործընթացների փոխգործունեությանը՝ Հայաստանի անդամակցությանը ՄՄ-ին և վերջինիս մերձեցումը Թուրքիայի հետ:
«Անկարան դեմ չի լինի: Ավելին՝ ՄՄ շրջանակներում նա ավելի շատ հնարավորություն կունենա ազդելու Հայաստանի քաղաքականության վրա: Մեկ այլ հարց է, որ Թուրքիայի անդամակցությանը ՄՄ-ին շատ ժամանակ դեռ կա, ինչը չես ասի Հայաստանի մասին» ,- հավելել է Խազինը:
