«Մամուլի հետ սուրճ» հաղորդման նոյեմբերի 15-ի հյուրը «Հայկական ժամանակ» օրաթերթի քաղաքական լրագրող Նարեկ Կիրակոսյանն է։
Խոսելով դեկտեմբերի 9-ին կայանալիք արտահերթ խորհրդարանական ընտրությունների մասին, մեր զրուցակիցն ընդգծեց. «Ակնկալում եմ սկանդալային քարոզարշավ, ինչին ականատես եղանք Երևանի ավագանու ընտրությունների ժամանակ։ Երբ ՔՊ ներկայացուցիչների հետ ենք խոսում, եթե ոչ հարցազրույցների ժամանակ, ապա մասնավոր զրույցներում ասում են, որ տանելու են սևի ու սպիտակի պայքար։
Պատկերացրեք՝ եթե հայտարարվի, որ ՀՀԿ-ն սև ուժ է, իրենց կողմից ինչ պատասխան է լինելու, ՔՊ-ից ինչպես են հակադարձելու»․
Նարեկ Կիրակոսյանի խոսքերով՝ թեժ պայքար է լինելու նաև այն պատճառով, որ ըստ որոշ տեղեկությունների «Իմ քայլը» դաշինքը ընտրել է «Նիկոլ վարչապետ» կարգախոսը։