Հայաստանում անպտուղ է 18-44 տարեկան յուրաքանչյուր 6-րդ զույգը: Այսօր տեղի ունեցած մամուլի ասուլիսի ժամանակ այս մասին ասաց Վերարտադրողական առողջության հայկական ասոցիացիայի նախագահ, մանկաբարձ-գինեկոլոգ, ռեպրոդուկտոլոգ Էդուարդ Համբարձումյանը:
«Սակայն ոչ բոլորն են կարողանում դիմել բժիշկներին՝ սոցիալական ծանր պայմաններից ելնելով: Հենց այստեղ է, որ նման զույգերին օգնության է հասնում «Արագիլ» հիմնադրամը»,- նշեց բժիշկը՝ հավելելով, որ անպտղություն առաջացնող պատճառները կանանց մոտ 22-ն են, տղամարդկանց մոտ՝ 18-ը:
Ասուլիսի մյուս բանախոս, «Արագիլ» հիմնադրամի փորձագետ Կարինե Թոխունցն էլ իր հերթին նկատեց, որ 2011-ից ի վեր՝ իրենց մոտ գրանցված է անպտղությամբ տառապող 300 զույգ: «Դրանք հիմնականում անապահով ընտանիքների ներկայացուցիչներ են: Ընդհանրապես, մեր ծրագրերում ներգրավում ենք այնպիսի զույգերի, որոնց ընտանեկան եկամուտը չի գերազանցում 200 հազար դրամը: Մինչ այժմ փոխհատուցել ենք 22 զույգերի բուժման ծախսերը: Ունենք արդեն իսկ ծնված մեկ եռյակ, մեկ հղիություն և մեկ հղիություն՝ զույգ երեխաներով »,- ասաց նա:
Կարինե Թոխունցի խոսքով՝ «Արագիլ» հիմնադրամի ֆինանսական միջոցները գոյանում են բարերարների նվիրատվություններից և հանգանակություններից: «Հիմնադրամի ամենախոշոր բարերարներն են Էթերի Կարապետյանը և Ջավահիր Ծառուկյանը: Ընդ որում՝ յուրաքանչյուր զույգի տրամադրում ենք մեկ փորձ, քանի որ դիմողները շատ-շատ են: Ֆինանսական ամենաբարձր շեմը, որ կարողանում ենք տրամադրել բուժման ամբողջական կուրսի համար, 1 մլն 600 հազար դրամն է: Զույգի նախնական հետազոտությունները, որ շուրջ 250 հազար դրամ են կազմում, հիմնադրամը չի հոգում»,- ասաց Կարինե Թոխունցը՝ հավելելով, որ ծրագրում ներառված կանանց թիվը, ըստ նախնական որոշման, չպետք է անցներ 35-ից, սակայն իրենք օգնում են նաև մինչև 40 տարեկան կանանց:
