ՄԱԿ-ն Իրաքում գտնվող սիրիացի փախստականներին օգնելու նպատակով 542 միլիոն դոլար կտրամադրի: Այս մասին Իրաք կատարած երկօրյա այցի ժամանակ հայտարարել է կազմակերպության գլխավոր քարտուղարը:
«ՄԱԿ-ը որոշել է Իրաքում գտնվող սիրիացի փախստականներին օգնելու նպատակով 542 միլիոն դոլար հատկացնել»,- ասել է Պան Գի Մունը Իրաքյան Քրդստանի մայրաքաղաք Էրբիլում կայացած մամլո ասուլիսում:
Գլխավոր քարտուղարը նշել է սիրիացիներին կյանքի բոլոր ոլորտներում օգնություն ցուցաբերելու անհրաժեշտության մասին, մասնավորապես ընդգծելով, որ երեխաները կրթություն չեն ստանում, փոխանցում է ИТАР-ТАСС-ը:
Պան Գի Մունը շնորհակալություն է հայտնել Սիրիայի բոլոր հարևաններին, որոնք աջակցում են փախստականներին:
Իրաք կատարած երկօրյա այցից հետո ՄԱԿ-ի ղեկավարը կուղևորվի Քուվեյթ, որտեղ կնախագահի Սիրիայի դոնոր-պետությունների համաժողովը: Ինչպես սպասվում է, ֆորումի ժամանակ սիրիացի փախստականների համար 6,5 միլիարդ դոլար կհավաքվի:
Այսօր Քուվեյթում կայացած ոչ կառավարական բարեգործական կազմակերպությունների հանդիպմանը հաջողվել է պայմանավորվել 400 միլիոն դոլար հավաքելու մասին:
