Հայաստանում խորհրդարանի լուծարման և արտահերթ ընտրությամբ նոր խորհրդարանի ձևավորման առնչությամբ հնչում են տարբեր տեսակետներ ու արվում են տարաբնույթ մտավարժանքներ, որոնք, սակայն, երբեմն իրականությունից կտրված են ավելի, քան, օրինակ, Սերժ Սարգսյանն էր: Մասնավորապես, Սերժ Սարգսյանն, օրինակ, հայտարարում էր, որ խորհրդարանական կառավարման պայմաններում ուղղակի չի կարող կառավարությունը չունենալ խորհրդարանի մեծամասնություն: Եվ Սարգսյանը միանգամայն իրավացի էր: Ըստ այդմ՝ նրա հրաժարականը և Նիկոլ Փաշինյանի վարչապետ ընտրվելը ուղղակի նշանակում են, որ Սարգսյանն իր հրաժարականով տվել էր միաժամանակ խորհրդարանի լուծարման քաղաքական համաձայնությունը: Այլ կերպ ասած, դեռ այդ պահից խորհրդարանի արտահերթ ընտրության թեման այլևս օրակարգում է, ընդ որում թե՛ քաղաքական, թե՛ ինչն առավել կարևոր է հանրային սպասումների օրակարգում։
Կարելի է նաև ենթադրել, որ Նիկոլ Փաշինյանը հարցը ՄԱԿ ամբիոն է բարձրացրել միանգամայն հաշվարկված՝ ունենալով իրավիճակի ամբողջական պատկերը: Ավելին, բավականին հիմքեր կան եզրակացնելու, որ հարցը բարձրացվել է ունենալով նաև արտաքին կարևոր քաղաքական գործընկերների հավանությունը:
Թեմայի շուրջ «Առաջին լրատվական»- ի հետ քննարկմանը մասնակցեցին ԱԺ անկախ պատգամավոր Շիրակ Թորոսյանը, ԱԺ «Ելք» խմբակցության պատգամավոր Հովիկ Աղազարյանը և ԱԺ «Ծառուկյան» դաշինքի պատգամավոր Գևորգ Պետրոսյանը:
«ԱԺ արտահերթ ընտրությունների պահանջն օրինական է, այն թիվ մեկ խնդիր է և պետք է տեղի ունենա,- ընդգծեց Շ. Թորոսյանը: Հ. Աղազարյանը հավելեց, որ կառավարությունը պատկանում է քաղաքական փոքրամասնությանը, ինչը բացասական հետևանքների և անորոշության է բերում. «Բոլոր ներդրողները սպասում են, որ մեր երկրում կայուն իրավիճակ ստեղծվի: Շատ կարևոր է արտահերթ ընտրությունների անցակացումը»:
Գ. Պետրոսյանն ընդգծեց, որ ԱԺ արտահերթ ընտրություններ անցկացնելու անհրաժեշտություն չկա: Նրա խոսքով՝ Ազգային ժողովն այս կազմով բացարձակապես խոչընդոտ չի հանդիսանում ՀՀ կառավարության համար՝ իրականացնելու սահմանադրական լիազորությունները և օրենքով նախատեսված գործառույթները:
Շ. Թորոսյանը հակադարձեց. «Չխոչընդոտելը քաղաքական կարգավիճակ չէ, ընդամենը վարքագիծ է, իրավիճակային որոշումներ են կայացվում: Բայց արդյո՞ք շարքային քաղաքացին՝ հարկատուն ուզում է, որ իր միջոցներով ձևավորված աշխատավարձը հենց մենք ստանանք, մենք լինենք այդ աթոռներին և ներկայացնենք Օրենսդիր մարմինը: Ժողովրդավարության հիմնական սկզբունքն այն է, որ խորհրդարանը ներկայացնում է ներքաղաքական համապատկերը, ընտրողի պատկերացումը: Ձայն բազմաց՝ ձայն Աստծո. եթե ժողովուրդն է, ուրեմն ճիշտ է: Հայաստանում իրավիճակ է փոխվել, մտածողություն է փոխվել, նոր մտածողությամբ նոր քաղաքական պահանջ է առաջ քաշվել, և դա պետք է կապիտալիզացվի քաղաքական գործընթացների մեջ»:
Անդրադառնալով խորհրդարանի լեգիտիմության վերաբերյալ Գ. Պետրոսյանի դիտարկմանը, Հ. Աղազարյանն ընդգծեց. «Որևէ մեկը չի կասկածում, որ ՀՀԿ-ն և ԲՀԿ-ն անցած խորհրդարանական ընտրություններում այդ արդյունքները գրանցել են բացառապես ֆինանսական ռեսուրսների օրինական և ոչ օրինական օգտագործմամբ: Ժողովրդի իշխանությունը գողացողը հանցագործ է, այդ ուժերն են ՀՀԿ-ն և ԲՀԿ-ն»:
Մանրամասն՝ տեսանյութում:
