ԱԺ պատգամավոր, «Լուսավոր Հայաստան» կուսակցության անդամ Էդմոն Մարուքյանը երեկ ԱԺ է ներկայացրել ՀՀ Քրեական օրենսգրքում փոփոխություն կատարելու մասին օրենքի նախագիծ: Մարուքյանը առաջարկում է փոփոխություն կատարել օրենսգրքի 69 հոդվածի երրորդ մասում, ըստ որի՝ մինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին` մեկ օրը հաշվելով մեկուկես օրվա դիմաց: Էդմոն Մարուքյանը հիշեցնում է, որ այս կարգավորումը ի սկզբանե եղել է 2003թ. ընդունված Քրեական օրենսգրքում, սակայն ավելի ուշ` 2004թ. Ազգային ժողովը փոփոխություն է կատարել օրենսգրքում և նախնական կալանքի տակ գտնվելու մեկ օրը հավասարեցվել է ազատազրկման մեկ օրվա հետ:
Գաղտնիք չէ, որ նախորդ իշխանությունները շահագրգռված էին կալանավայրերի գերծանրաբեռնվածությամբ, քանի որ կալանավայրերը դիտարկվում էին որպես եկամտի կայուն և հուսալի աղբյուր: Իսկ որքան մեծ է կալանավորների թիվը, այնքան ավելի մեծ է այդ եկամտի չափը: Մարուքյանը իր կողմից ներկայացված նախաձեռնությունը հիմնավորելու համար բերում է միջազգային փորձը, այդ թվում՝ Ռուսաստանինը: ՌԴ Պետդուման այս տարվա հուլիսին կատարել է համապատասխան փոփոխություն, ըստ որի՝ նախնական կալանքի մեկ օրը հավասարեցվել է ազատազրկման մեկուկես օրվա հետ:
Հոլանդիայի Քրեական օրենսգիրքը սահմանում է, որ քրեական գործի քննության ընթացքում նախնական կալանքի, հոգեբուժական կամ կլինիկական հաստատությունում գտնվելու, արտասահմանում էքստրադիցիայի սպասելիս, կալանքի տակ գտնվելու ժամանակահատվածը հաշվակցվում է Հոլանդիայում ազատազրկման տեսքով նշանակվող պատժին՝ առանց սահմանելու որևէ հարաբերակցություն, այսինքն՝ այստեղ ևս թողնելով դատարանի հայեցողությանը:
Ամենակարևորը, Էդմոն Մարուքյանը առաջարկում է, որ այս փոփոխությունը ունենա հետադարձ ուժ և տարածվի բոլոր ազատազրկվածների վրա՝ ընդհուպ մինչև 2004թ. հարուցված քրեական գործերի մասով: Նման հնարավորություն տալիս է Սահմանադրության 73-րդ հոդվածը, համաձայն որի՝ անձի իրավական վիճակը բարելավող օրենքները և այլ իրավական ակտերը հետադարձ ուժ ունեն, եթե դա նախատեսված է այդ ակտերով: Սա, իհարկե, համաներում չի լինի, բայց էապես կկրճատի ազատազրկման մեջ գտնվող անձանց պատժաչափը: Այսպես, շատ դեպքերում, մինչև դատարանի օրինական ուժի մեջ մտնելը մարդիկ մեկ կամ նույնիսկ ավելի երկար գտնվում են նախնական կալանքի ռեժիմում: Եվ եթե այս օրենքը ուժի մեջ է մտնում և մեկ օրը հաշվարկվում է մեկուկես օր, նախնական կալանքում գտնվելու մեկ տարին դառնում է մեկուկես տարի, և կես տարով կրճատվում է կալանավորի կալանավայրում մնալու ժամկետը: Էդմոն Մարուքյանը հույս ունի, որ այս փոփոխության ընդունման արդյունքում էականորեն կբեռնաթափվեն կալանավայրերը, և հարյուրավոր դատապարտյալների և նրանց հարազատների նկատմամբ նման օրենքի կիրառումը կլինի մարդասիրության դրսևորում: Մնում է, որ խորհրդարանը կողմ քվեարկի նման մարդասիրական օրենքի ընդունմանը:
