2008 թվականի Մարտի 1-ի զոհերից ոստիկանության զորքերի ժամկետային զինծառայող Տիգրան Աբգարյանի մայրը՝ Ռուզաննա Հարությունյանը չի հավատում, որ իր որդու սպանությունը երբևէ կարող է բացահայտվել։
«Առաջին լրատվական»-ի հետ զրույցում որդեկորույս մայրը վրդովմունք հայտնեց երկրորդ նախագահ Ռոբերտ Քոչարյանի ազատ արձակման վերաբերյալ։
«Ինչ անձեռնմխելիության մասին է խոսքը, Քոչարյանը 10 տարի է՝ իմ ու քո նման ՀՀ քաղաքացի է։ Անձեռնմխելիությունն իմ որդու կյանքն էր, որ իրենք իրենց իրավունք վերապահեցին վերցնել։ Ո՞վ էր իրենց իրավունք տվել իմ որդու կյանքը վերցնել, 18 տարեկան էր, ժամկետային զինծառայող։ Աստված էին, ինչ էին, որ իրենց իրավունք վերապահեցին որդուս կյանքը խլել։ Ինչի՞ համար, իրենց փափուկ աթոռների՞։ Էդ ո՞վ որոշեց, որ Քոչարյանն անձեռնմխելի է, այդ 45 հոգի պատգամավորնե՞րը, որ 15-20 տարի է՝ աթոռների վրա նստած են»,- հուզմունքը մի կերպ զսպելով ասաց 2008-ի մարտի 1-ին սպանված Տիգրանի մայրը։
Տիկին Ռուզաննան ասում է՝ վստահ էր, որ Քոչարյանին ինչպես բռնել էին, այդպես էլ բաց էին թողնելու, ուրախանալու համար դեռ շուտ է։
Ոստիկանության զորքերի ժամկետային զինծառայող Տիգրան Աբգարյանը, ըստ պաշտոնական տվյալների, 2008 թվականի մարտի 1-ին նախագահ Ռոբերտ Քոչարյանի կողմից արտակարգ դրություն հայտարարելուց 10 րոպե առաջ արդեն իսկ եղել է հիվանդանոցում։ Հրազենային ծանր վնասվածքով նա ապրել է 40 օր, որից հետո մահացել է հիվանդանոցում։ Տիգրանի մայրն ասում է, որ իր որդուն հիվանդանոցում պահել են այնքան, մինչև Սերժ Սարգսյանն իր երդմնակալության արարողությունը ավարտի ու ստանձնի նախագահի լիազորությունները, որից մեկ օր հետո հայտնել են, որ նա մահացել է։
Պաշտոնական վարկածի համաձայն՝ Տիգրան Աբգարյանը սպանվել է անհայտ մեկի կողմից հեռվից արձակված կրակահերթից՝ Լեո-Պարոնյան խաչմերուկի մոտ։
