«Երևանի քաղաքապետը հրաժարական տվեց… Հերթը Վանաձորի քաղաքապետինն է»,- երեկ ֆեյսբուքյան իր էջում այսպիսի գրառում էր կատարել ԱԺ «Ելք» խմբակցության պատգամավոր Էդմոն Մարուքյանը: Վանաձորի քաղաքապետ Մամիկոն Ասլանյանն իր էջում կոշտ արձագանքել է Մարուքյանի գրառմանը` անձնական վիրավորանքներով, որակումներով, բացահայտ ցինիզմով ու կեղծիքով: «Օդում պտտվող համառ լուրերի համաձայն, ՀՀԿ-ի «յուղալի» սեղանների մոտ երկյուղալի դեմքով թերմացք «փախցնելիս»՝ ձեզ շատ տեսնողներ են եղել… դուք իգնոր վիճակից մի հատ դուրս եկեք, նոր հրաժարական պահանջեք…»,-գրել է Վանաձորի հանրապետական պատգամավորը:
Էդմոն Մարուքյանի արձագանքը չի ուշացել. նա կոչ է արել քաղաքապետին հրաժարական տալ. «ՀՀԿ-ի վանաձորյան թերմացքը փորձել է անդրադառնալ իր հրաժարականի մշտական պահանջին… Լավ կանեք ՀՀԿ ֆեյսբուքյան գրագիրներին սաստեք, թե չէ ինձ վրա հարձակվելուց Ձեր մանդատագող բնույթը չի փոխվում… Սպասում ենք հրաժարականիդ դիմումին»։
Այս պատմության, Մամիկոն Ասլանյանի ցինիկ պահվածքի մեջ ուշագրավ է մի քանի հանգամանք: 2016-ի աշնանը ՀՀԿ անդամ Մամիկոն Ասլանյանը քաղաքապետ դարձավ մի իրավիճակում, երբ նրա լեգիտիմությունը վիճահարույց էր անգամ քրեսօլիգարխիայի տեսանկյունից: Ընտրակաշառքն ու վարչական ռեսուրսն անգամ չօգնեցին, որ հանրապետական Մամիկոն Ասլանյանը կոալիցիոն ՀՅԴ-ի օգնությամբ քաղաքապետ դառնա քաղաքակիրթ ճանապարհով, և նա պաշտոնին հասավ մանդատագողության հետևանքով, երբ փակ գաղտնի քվեարկության ժամանակ ընդդիմության մի քանի ներկայացուցիչներ անհայտ հանգամանքներում քվեարկեցին նրա օգտին:
Հայաստանի նոր կառավարման համակարգի հիմքում դրվեց մանդատագողության զազրելի ականը: ՀՀԿ-ն նույնիսկ մեկ քաղաքի մասշտաբով չկարողացավ ընդունել իր արժանապատիվ պարտությունը և Մամիկոն Ասլանյանի դեմքով պարզապես ուզուրպացրեց քաղաքային իշխանությունը:
Թվում էր` թավշյա հեղափոխությանը պետք է հաջորդեր Մամիկոն Ասլանյանի անհապաղ հրաժարականը, սակայն թռչելու ունակություն չունեցող հայտնի կենդանու օրինակով Վանաձորի քաղաքապետը փորձում է փաթաթվել հեղափոխության ոտքերին:
Մամիկոն Ասլանյանի գրառման բովանդակությանն անդրադառնալը նույնիսկ վիրավորական է, որովհետև ՀՀԿ էլիտայայի խրախճանքի կադրերից դուրս մնացած այս մարզային հանրապետականը Վանաձորով մեկ տարածել էր իր և նախկին վարչապետ Կարեն Կարապետյանի լուսանկարները` փաստորեն ՀՀԿ-ից «տղա բերելով» իրեն մերժող վանաձորցիների վրա։
Սա է Վանաձորի հանրապետական պատգամավոր Մամիկոն Ասլանյանի բարոյական նկարագիրը, սակայն նա շարունակում է կառչած մնալ քաղաքապետի աթոռին ու նաև այն ուժերի շնորհիվ, որոնք իբրև թե աջակցել են թավշյա հեղափոխությանը:
Համենայն դեպս ՀՅԴ-ն, որը Նիկոլ Փսշինյանի ժամանակավոր կառավարության մաս է, Վանաձորում կրծքով պաշտպանում է հանրապետական մանդատագող քաղաքապետին: Նույն իրավիճակում է ՕԵԿ-ը, որը երկրի մասշտաբով պաշտպանում է հեղափոխությունը, սակայն Վանաձորում քրեաօլիգարխիկ ՀՀԿ-ի դաշնակիցն է:
ՀՅԴ-ի և ՕԵԿ-ի վարքագիծը քաղաքական կոռուպցիայի տիպիկ դրսևորում է, ինչի հետևանքով Մամիկոն Ասլանյանն ոչ միայն պաշտոնն է պահում, այլ հանդգնում է հոխորտալ Նիկոլ Փաշինյանի զինակիցներից մեկի վրա:
Սակայն զուր է Մամիկոն Ասլանյանը հոխորտում. հեղափոխությանը հաջորդած առաջին շաբաթներին ՀՀԿ անդամ շատ քաղաքապետեր առյուծ էին «կտրել»` միաբերան պնդելով, թե հեռանալու մտադրություն չունեն: Այս օրերին հանրապետական պատգամավորները հեռանում են իրար հերթ չտալով` կատվի հեզությամբ: Բացառություն չի լինի նաև Մամիկոն Ասլանյանը:
