Կրթության և գիտության նախարար Արայիկ Հարությունյանը իր ֆեյսբուքյան էջում լուսանկար էր տեղադրել, որում նշված էր Սպիտակ քաղաքի դպրոցներից մեկի խորհրդի կազմը։ Նախարարի տեղեկության համաձայն՝ այդ դպրոցում տեղի է ունենալու տնօրենի ընտրություն, իսկ խորհրդի կազմում ընդգրկված են գործող տնօրենի, որը միաժամանակ թեկնածու է, ազգականները, մտերիմները, ընկերները։
«Մարդու այս տեսակը յուրահատուկ ուսումնասիրության կարիք ունի, որովհետև այսքանից հետո նրանք ցանկանում են վերարտադրվել։ Շուտով խորհուրդների ձևավորման կարգը կփոխվի, ինչն այսպիսի խայտառակություններ թույլ չի տա։ Նաև կարող է հարց լինել, թե ինչպես է սա հնարավոր հիմա»,- գրել է նախարարը՝ չնշելով, թե կոնկրետ որ դպրոցի մասին է խոսքը։
«Առաջին լրատվական»-ին հայտնի դարձավ, որ խոսքը Սպիտակի Դ. Տեր-Սիմոնյանի անվան համար 2 հիմնական դպրոցի տնօրեն, Սպիտակի ավագանու անդամ, ՀՀԿ-ական Լուսինե Մաթոսյանի մասին է։ Ի դեպ՝ դպրոցի խորհրդում ընդգրկված են վերջինիս ամուսինը, հորեղբոր որդին, թոռը, մտերիմ ընկերուհին և այլք։
Փորձեցինք խոսել դպրոցի տնօրենի հետ, սակայն վերջինս բավական կոպիտ ձևով հրաժարվեց հեռախոսով խոսել, երբ տեղեկացրինք, թե ինչ թեմայի մասին ենք ուզում զրուցել։ «Կգաք այստեղ, ձեր փաստաթղթերը կներկայացնեք, կտեսնեմ՝ ով եք, նոր կխոսենք»,- ասաց ու անջատեց հեռախոսը ՀՀԿ-ական տնօրեն Մաթոսյանը։
Ի դեպ՝ նշենք, որ այսօր՝ ժամը 13։00-ին, դպրոցում անցկացվելու էր հաստատության տնօրենի պաշտոնի համար նախատեսված բաց մրցույթը։