Արևմուտքը հասկանում է, որ տարածաշրջանում իրեն հատկացված տեղը նեղանում է, և պետք է գործել: Այս մասին այսօր լրագրողների հետ հանդիպման ժամանակ ասաց «Արևմտահայոց հարցերի ուսումնասիրության կենտրոն»-ի տնօրեն, քաղաքագետ Հայկազուն Ալվրցյանը՝ անդրադառնալով հայ-թուրքական բանակցություններում Արևմուտքի հնարավոր ազդեցության հանգամանքին: Նրա համոզմամբ՝ կարևոր է այս հանգամանքը հաշվի առնելը, քանի որ, ի վերջո, Հայաստանը կատարեց մեկ քաղաքական ընտրություն, որն ԱՄՆ-ին ու Եվրոպային լրջորեն անհանգստացրեց, և եվրոպական համայնքը նույնպես շատ լուրջ ընդունեց ՀՀ քայլը, և Արևմուտքն այսօր հասկացավ, գիտակցեց, որ հարկավոր է ակտիվացնել տարածաշրջանում իր ներկայությունը:
«Մենք չենք կարող չփաստել, որ վերջին տարիներին, պայմանավորված Մերձավոր Արևելքում կատարվող շատ լուրջ իրադարձություններով, Արևմուտքի հետաքրքրություններն այստեղ գրեթե զրոյական էին, այն աստիճանի, որ հենց նույն Արևմուտքի թույլտվությամբ, անտարբերությամբ կամ ցանկությամբ հայ-ադրբեջանական բանակցությունները մտել էին փակուղի: Նրանց դա չէր հետաքրքրում, բայց այսօր տեսանք, որ վիճակը բավականին բարդանում է ապագայում իրենց համար, իրենց հատկացված տեղը նեղանում է, և նրանք պետք է այստեղ ակտիվություն դրսևորեն:
Շատ զարմանալի են Արևմուտքի ֆինանսական ու նյութական խոստումները. մեծ-մեծ գումարներ, ներդրումներ այն դեպքում, երբ վերջին տարիներին այդ մասին ո՛չ ուզում էին մտածել ու ոչ էլ կարևորություն տալ: Հասկանալի է այդ պատճառը: Սա նշանակում է, որ մրցակից պետությունների միջև պետք է նոր զարգացումներ սպասել: Հետաքրքիրն այն է, որ մրցակիցները՝ ԵՄ-ն, ԱՄՆ-ն ու ՌԴ-ն, Արցախի հարցով առաջին հերթին շահագրգռված պետություններն են: Այստեղ միասնաբար գործելու հետ միասին՝ նկատվում է մրցակցային մեծ հեռանկար: Մրցակցությունը կարող է իր հետ բերել օգտակար ու վնասակար իրողություններ հատկապես Արցախի հարցում»,- մեկնաբանեց բանախոսը:
