Փախստականների գործով ՄԱԿ-ի գերագույն հանձնակատարի վարչությունը (UNHCR) տեղյակ է եղել Արևմտյան Աֆրիկայում միջազգային իրավապաշտպան կազմակերպությունների աշխատակիցների կողմից անչափահաս փախստականների սեռական շահագործման դեպքերի մասին։ Այս մասին գրում է The Times պարբերականը։
2001-ին UNHCR-ի և Save the children-ի պատրաստած զեկույցում նշվում են ավելի քան 40 մարդասիրական կազմակերպություններ, որոնցից 15-ը միջազգային են։
Զեկույցում նշվում է, որ մարդասիրական կազմակերպության աշխատակիցները հաճախ սեռական ծառայություններ են պահանջել՝ պարեն և անհրաժեշտ այլ բաներ մատակարարելու փոխարեն։
Փաստաթղթի հեղինակներն ընդգծում են հետագա հետաքննության անհրաժեշտությունը, քանի որ հավաքած մեղադրանքները հնարավոր չի եղել լիովին հաստատել։ Սակայն դրանց քանակը «խնդրի ծավալների կրիտիկական ցուցանիշ է»։
«Անհատական ցուցակները»՝ ոչ լրիվ տեղեկությամբ, 67 մարդու մասնակցությամբ դրվագներով, փոխանցվել են UNHCR-ի բարձրաստիճան աշխատակիցներին։ Պարբերականի տվյալներով՝ պաշտոնաթող է արվել առնվազն տասը մարդ, սակայն ոչ ոքի մեղադրանք չի առաջադրվել։ UNHCR-ի ներկայացուցիչներն այս մասին տեղեկությունը փոխանցել են բոլոր մարդասիրական կազմակերպություններին։
Երեք կազմակերպությունից սեռական բռնության մեջ կասկածյալներին հեռացրել են։
