Օրերս վարչապետ Նիկոլ Փաշինյանը հայտնել է, որ մարտին լրացել է որդու՝ Աշոտի 18 տարեկանը, և պատրաստվում է սահմանված կարգով մեկնել ծառայության։ Որդին էլ իր հերթին դիմում է գրել, որպեսզի զինծառայությունը անցնի Արցախի Հանրապետությունում։ Արցախում ողջունում են Նիկոլ Փաշինյանի և որդու որոշումը։ Ավելին՝ Նիկոլ Փաշինյանի հայտարարությունը նորություն չէ Արցախի համար։ «Առաջին լրատվական»-ի հետ զրույցում ասաց ԼՂՀ ԱԺ «Հայրենիք» կուսակցության պատգամավոր Ռուդիկ Հյուսնունցը։ Նա պատմեց, որ 2016-ի ապրիլյան դեպքերի ժամանակ Փաշինյանը որդու հետ առաջնագիծ է մեկնել, նա որդու հետ այնտեղ է եղել․ «Ապրիլյան դեպքերի ժամանակ Փաշինյանը տղայի հետ մեզ մոտ էին՝ առաջին դիրքերում, և, բնականաբար, այս հայտարարությունը և հայրենասիրական էնտուզիազմը կոչ էր, որ ամեն մի հայ պարտավորություն ունի հայրենիքի նկատմամբ, Արցախի նկատմամբ։ Այսօր պատերազմն Արցախում է, հարյուր տարի առաջ եղել է Սարդարապատում, և այն ժամանակ Արցախի գունդը Սարդարապատում էր, այսօր Հայաստանը Արցախի անվտանգության երաշխավորն է, և կարծում եմ՝ այս կոնցեպտն աշխատում է դարերով և պետք է շարունակվի»,- ասաց Ռուդիկ Հյուսնունցը։
Նախկին իշխանությունների օրոք մեկ անգամ չէ, որ բարձրաձայնվել է պաշտոնյաների որդիների՝ ծառայությունից խուսափելու դեպքեր։ Ռուդիկ Հյուսնունցի խոսքերով՝ հիմա համակարգը պետք է փոխվի, և ժողովրդի զարթոնքը քայլ առ քայլ հաղթանակներով պետք է արձանագրենք և նոր տարեգրություն սկսենք նոր էջից։ Նա Նիկոլ Փաշինյանի այս քայլը ուղերձ է դիտարկում համայն հայության համար, և այդ կոչը միայն իր որդու հետ չէր կապված, այլ ուղղված էր համայն հայությանը, նրանց, ովքեր ժամանակին լքել են Հայաստանը, պայմաններ է ստեղծում, որ նրանք գան ուղղակի կանգնեն հաշվառման և իրենց պարտքը տան հայրենիքին։
Արցախի ԱԺ պատգամավորը վստահ է, որ բանակի քաղաքական մթնոլորտը, մտածողությունը, մեր առօրյայում շատ բան է փոխելու, պարզապես բոլորս պետք է կանգնենք օգնենք։
«Ի դեպ, մենք նման խնդիր չենք ունեցել, որ որևէ մեկի որդին խուսափի ծառայությունից, նման բարդ երևույթներ չենք ունեցել։ Նախքան իշխանափոխությունը միշտ ասել եմ, որ կամ Ղարաբաղի փրկությունը այն է, որ աստիճանաբար այս բարքերը գան Հայաստան, կամ այդ բացասական բարքերը կործանելու են Արցախը»,- հավելեց պատգամավորը։
Արցախի ԱԺ «Դաշնակցություն» խմբակցության ղեկավար Արմեն Սարգսյանն «Առաջին լրատվական»-ի հետ զրույցում նշեց, որ Արցախում շատ բարձր են գնահատում Նիկոլ Փաշինյանի արած քայլը։
«Վերջապես անկախ Հայաստանի վարչապետի որդին ծառայության է անցնում ԼՂ բանակում, այնպես, ինչպես Առաջին հանրապետության վարչապետի երեք որդիները, և Հայաստանը 100-ամյակի ապակցությամբ վերցնում է Առաջին հանրապետության ամբողջ բարոյական արժեքները և շարունակում առաջ»,- ասաց Արմեն Սարգսյանը։
Նա նույնպես շեշտեց, որ Արցախում բոլոր ղեկավարների երեխաները՝ սկսած Արցախի նախագահի որդուց մինչև Անվտանգության ծառայութան պետի որդին, նախարարների, ԱԺ պատգամավորների որդիները, բոլորը ծառայել են կամ ծառայում են բանակում, և ինքը չի հիշում որևէ դեպք, երբ նրանցից որևէ մեկը չի ծառայել, և սա սովորական պրոցես է։ Նրա դիտարկմամբ՝ շատ ուրախալի է, որ հարյուրամյակի շեմին վարչապետի որդին այսպիսի հայտարարություն է տվել՝ լինել այնտեղ, որտեղ ավելի ծանր է ծառայելը։
Արմեն Սարգսյանը նկատեց, որ Նիկոլ Փաշինյանի հայտարարությունը կարևոր է ոչ միայն նրանց համար, ովքեր խուսափել են ծառայությունից, բայց կարևոր է նաև նրանց համար, ովքեր ծառայել կամ ծառայում են բանակում․ «Եվ սա ոչ միայն չծառայողների, այլ նաև ծառայողների համար է շատ լավ։ Եվ իրենք գիտեն, որ իրենց ծառայությունը բերեց նրան, որ ընդհանուր համակարգ ձևավորվեց, որ բոլորը հավասար են։ Լավ է, որ այս երևույթը կտարածվի ՀՀ բոլոր ղեկավարների մեջ։ Ես ուրախ եմ, որ երկիրը մեծ քայլ է կատարում մի շարք թերություններ վերացնելու, արդարությունը հաստատելու համար, և ամենակարևորը՝ ստեղծվեն մեխանիզմներ, որոնք կգործեն անկախ ղեկավարի փոփոխությունից, որ լինի արդարություն, օրենքի գերակայություն, սա մեր երազանքն է եղել շարժման առաջին իսկ օրից, որ ունենանք օրենքի երկիր»,- հավելեց պատգամավորը։
