«Վիքիպեդիա»-ի հիմնադիր 47-ամյա Ջիմի Ուեյլսը պարգևատրվել է Նիլս Բորի ոսկե մեդալ մրցանակով, որը ՅՈՒՆԵՍԿՕ-ն հանձնում է գիտության զարգացման զգալի ներդրման համար:
Համապատասխան տեղեկատվությունը հրապարակել է ՄԱԿ-ի կայքը: Մրցանակը հանձնվել է Կոպենհագենում «Բաց աշխարհ» համաժողովին, որը նվիրված է Նիլս Բորի ատոմի մոդելի 100-ամյակին:
Իր ելույթում «Վիքիպեդիա»-ի հիմնադիրը հայտարարել է ինտերնետ-նախագծի զարգացումը շարունակելու, այն աշխարհի բոլոր լեզուներով հասանելի դարձնելու մտադրության մասին:
Նիլս Բորի ոսկե մեդալը հաստատվել է 1985թ.՝ ի պատիվ մեծն գիտնականի 100-ամյակին: Բորը անթերի էր համարում այն հասարակությունը, որը խրախուսում է գիտելիքի ազատ փոխանակումը և համագործակցությունը:
