ԱԺ «Ժառանգություն» խմբակցության ղեկավար Զարուհի Փոստանջյանին վրդովեցրել է այն, որ ԱԺ աշնանային նստաշրջանի ավարտից և հիմներգի հնչելուց հետո նորից ստիպված են լինելու Կառավարության կողմից առաջարկված արտահերթ նիստին մասնակցել։ Դեկտեմբերի 6-ին ԱԺ ճեպազրույցների ժամանակ Փոստանջյանը տեսակետ հայտնեց, որ արտահերթ նիստի հրավիրումը պայմանավորված է նրանով, որ ժամանակացույցի իր գործառույթները կառավարությունը չի ավարտել, և կան հիմնական օրենքներ, որոնք պետք է սպասարկեն այս կառավարությանը՝ հարկահավաքի և այլ գործերի համար: Պատգամավորի խոսքով՝ արտահերթ նիստի հրավիրումը կառավարության անփույթ աշխատանքի հետևանք է. այս կերպ նրանք փորձում են իրենց թափթփվածության հետևանքով կիսատ մնացած գործերն ավարտել։
«Դա խոսում է այն մասին, որ այս կառավարությունը թափթփված, անշնորհք, անկազմակերպ կառավարություն է, որը չի կարողացել ավարտին հասցնել իր աշխատանքները և հիմա փորձում է ԱԺ-ն օգտագործելով՝ իրականացնել իր գործառույթները»,- ասաց նա։
Խմբակցության ղեկավարի խոսքով՝ մի շարք օրենքներ կան, որ լրացուցիչ հարկերի հավաքման համար մինչև տարեվերջ պիտի ընդունվեն: Դրանցից նա առանձնացրեց կենսաչափական տվյալներով անձնագրերի ներդրումը՝ շուրջ 100 հազար քաղաքացի կարիք ունի ստանալու նոր անձնագիր, որ արժենալու է 28 հազար դրամ:
Նստաշրջանն ամփոփելով՝ Փոստանջյանը թե՛ ԱԺ, թե՛ կառավարության աշխատանքն անբավարար գնահատեց: Դիտարկմանը՝ ինչո՞ւ ԱԺ ոչ իշխանական չորս խմբակցությունները չեն բոյկոտում նիստը և ավելի սուր գործողությունների անցնում, խմբակցության ղեկավարը պատասխանեց, որ իրենց փորձում են լռեցնել, անջատում են խոսափողը, ուստի բոյկոտեն, թե ոչ՝ դա իշխող մեծամասնությանը որևէ կերպ չի կաշկանդում:
Այդուհանդերձ, պատգամավորը համաձայն է՝ պետք է դիմել ռադիկալ որոշումների: Պարտադիր կուտակային կենսաթոշակային համակարգին անցման դեմ բողոքող երիտասարդների կողքին կանգնած ԱԺ խմբակցությունների՝ ՍԴ դիմում ներկայացնելուն զուգահեռ, ըստ պատգամավորի, այս չորս ուժերը համատեղ պետք է բողոքի ակցիաներ անեն: Նա նաև կարծում է, որ երկրում պետք է հանրապետական գործադուլ իրականացվի այդ օրենքը տապալելու համար:
Լրագրողները հիշեցրին, որ խմբակցության անդամ Թևան Պողոսյանը չմասնակցեց համակարգի ներդրման դեմ իրականացվող ակցիաներին, ինչին Փոստանջյանը պատասխանեց, որ Պողոսյանը կուսակցության անդամ չէ և իրավունք ունի իր կարծիքն ազատ արտահայտելու:
