Անկարան ու Բաղդադը չեն կարողանում կիսել Իրաքյան Քրդստանի նավթային պաշարները: Ինքնավարության իշխանությունները հայտարարել են, որ մոտ ժամանակներս կգործարկեն նավթատար, որը Թուրքիայի տարածքով կհասնի Եվրոպա: Դա շահավետ է և´ թուրքական իշխանություններին, որոնք հետաքրքրված են էներգակիրների նոր մատակարարներով, և´ իրաքցի քրդերին, որոնք ձգտում են Բաղդադից մեծ անկախության ձեռքբերման: Հանուն շահերի՝ կողմերը պատրաստ են մոռանալ թուրք-քրդական բազմամյա թշնամության մասին:
Իրաքյան կառավարության համար գործարքն իսկական շոկ է դարձել. Բաղդադում պատրաստ չեն Էրբիլի հետ կիսել նավթից ստացված համազգային եկամուտները՝ գրում է Kommersant-ը:
Սահմանին տիրող իրավիճակից են կախված Իրաքից դեպի Թուրքիա նավթի մատակարարումները, որոնք մշտապես խափանվում են քուրդ անջատողականների հարձակումների հետևանքով: Օրինակ՝ հունվարին թուրքական Մարդին նահանգում Քիրքուկ- Յումուրթալըք նավաթատարի հատվածում տեղի ունեցած պայթյունից հետո խողովակաշարի թողունակությունը եռակի նվազել է: Մատակարարումները նախկին մակարդակի բերել չի հաջողվել մինչ օրս:
Նավթային «անբավարարությունը» Բաղդադը խոստացել է Անկարային փոխհատուցել Բասրա-Ջեյհան երթուղով նոր նավթատարի կառուցման հաշվին: Այդ նախագծի մասին իրաքյան իշխանությունները հատարարել էին մարտին, սակայն դրա իրականացմանը մինչ օրս չեն անցել: Այժմ Անկարան ոչ միայն Բաղդադի վրա ճնշման լծակներ է փնտրում, այլև իր համար նավթի նոր մատակարարներ:
Անցած շաբաթ Թուրքիայի վարչապետ Ռեջեփ Թայիփ Էրդողանը հանդիպում էր ունեցել Իրաքյան Քրդստանի իր գործընկերոջ՝ Նեչիրվան Բարզանիի հետ: Անկարան երկար ժամանակ մեկնաբանություն չի արել, և հանդիպմումից հետո միայն երրորդ օրը թուրքական ԱԳՆ-ն հաղորդագրություն տարածեց, որում հաստատեց էներգետիկ համագործակցության ոլորտում Իրաքյան Քրդստանի հետ պայմանավորվածությունների ձեռքբերումը:
Անկարան ու Էրբիլը շտապել են վստահեցնել Իրաքի ղեկավարությանը, որ Թուրքիային վաճառվելիք նավթի եկամուտների 83 տոկոսը կուղղվի գանձնարան, սակայն իրաքյան կառավարությունում խոստումները համարել են չհիմնավորված՝ վախենալով Էրբիլի աճող հեղինակությունից:
Որպես պատասխան միջոցառում՝ Բաղդադն Իրաքյան Քրդստանի գլխավերևով թռիչքների մասնակի սահմանափակում է ներմուծել՝ տարածելով այն թուրքական բիզնես ավիացիայի վրա: Թուրքիայի ԱԳՆ-ն նոր հայտարարություն է տարածել, որում հստակեցրել է, որ Անկարան քրդերի հետ համաձայնագիր չի ստորագրել, այլ միայն պայմանավորվածություններ է ձեռք բերել: Գործարքից հրաժարվելու մասին թուրքական ղեկավարությունում չեն խոսում, սակայն խոստովանում են, որ դա կարող է վնասել առանց այդ էլ թուրք-իրաքյան լարված հարաբերություններին:
