«Շատ պայծառ, երիտասարդ կառավարություն է ձևավորվել․ հին կառավարության դեմքը վերջապես փոխվեց, երիտասարդ կադրեր եկան, որոնք հուսով եմ՝ կառավարության նիստերի ժամանակ չեն քնի։ Ընդհանրապես Նիկոլ Փաշինյանի թիմը, որի հիման վրա ձևավորվեց այս նոր կառավարությունը՝ շատ խոստումնալից է և այն մեկնաբանությունները, թե երիտասարդներ են նշանակվել նախարարների պաշտոններում՝ գտնում եմ, որ ընդունելի չէ»,- «Առաջին լրատվական»-ի հետ զրույցում ընդգծեց առողջապահության նախկին նախարար Արարատ Մկրտչյանը՝ անդրադառնալով արդեն ձևավորված նոր կառավարությանը՝ այս համատեքստում կարևորելով նաև սերնդափոխության անհրաժեշտությունը։
Վերջինիս կարծիքով՝ նոր կառավարության գործունեության ամենակարևոր գրավականներից մեկը փոխկապակցված և թիմային աշխատանքի իրականացումը պետք է լինի, ինչը մեր զրուցակցի գնահատմամբ՝ նախորդ կառավարությունները չունեին։
Անդրադառնալով նաև մասնավորապես առողջապահության ոլորտին և նորանշանակ նախարար Արսեն Թորոսյանին, Արարատ Մկրտչյանը նշեց․ «Արսեն Թորոսյանը բավականին փորձ ունեցող երիտասարդ է, կրթված և բացի դրանից ունի նաև ոչ շատ մեծ բուժհիմնարկի կառավարման փորձ, ուստի կարծում եմ, որ նա որպես նախարար կհաջողի։
Ըստ իս՝ Արսեն Թորոսյանը իր թիմով կկարողանա առողջապահության ոլորտի առաջնահերթությունները դասակարգել՝ ելնելով այս համակարգում տիրող իրավիճակից։ Ուղղակի այն կառավարությունները, որոնք ձևավորվում են այսպիսի իրավիճակներում, պետք է իրատեսական ծրագրերի սահմաններում ձևակերպեն խնդիրների առաջնահերթությունը․ մի քանի օր է արդեն, որ զգում եմ, որ պոպուլիզմի որոշ դոզա կա, հետևաբար նոր կառավարությանն ուղղակի խորհուրդ կտայի, որ խոստումները լինեն հնարավորությունների շրջանակներում, քանի որ առաջին հերթին՝ այս կառավարությունն աշխատելու է նախորդ կառավարության ընդունած բյուջեով, ըստ այդմ՝ նախորդ կառավարության ծրագրերն են ամրագրված առողջապահության բյուջեին համահունչ և պետք է փորձել հնարավորինս տեղավորվել եղած ֆինանսական միջոցների սահմաններում, իսկ մենք գիտենք, որ միջնաժամկետ ծրագրով առողջապահության համակարգի ֆինանսավորումը մոտ 6 միլիարդով կրճատված է և հենց այստեղ է, որ իրատեսական խոստումներ պետք է տրվեն և այդ խոստումներն իրականացվեն»։
Մանրամասները՝ տեսանյութում։
