Բրազիլիայի Աշխատավորների կուսակցության մի քանի տասնյակ պատգամավորներ պահանջել են Ազգային կոնկրեսի թղթաբանության մեջ իրենց անուններին ավելացնել Լուլա անունը, որպեսզի այդպիսով իրենց աջակցությունն արտահայտեն ազատազրկման դատապարտված երկրի նախկին նախագահ Լուիս Ինասիու Լուլա դա Սիլվային: Այս մասին հաղորդում է Cuba Debate-ը:
Բողոքի նախաձեռնությանը միացել են Աշխատավորների կուսակցության առաջնորդ Գլեյզի Հոֆմանը, ով իր Twitter-ում երկրի սենատի ղեկավարին ուղղված ուղերձ է հրապարակել, որտեղ խնդրում է նիստերի ժամանակ իր անունն ու ազգանունը պաշտոնապես գրել Գլեյզի Լուլա Հոֆման:
Ակցիայի բոլոր մասնակիցները Բրազիլիայի Ազգային կոնգրեսի ղեկավարությանը խնդրագիր են ներկայացրել:
Հիշեցնենք, որ դատարանը Բրազիլիայի նախկին նախագահին դատապարտել է 12 տարվա ազատազրկման: Լուլա դա Սիլվան պնդել է, որ իրավունք ունի մնալ ազատության մեջ, քանի դեռ չեն ուսումնասիրվել բողոքարկումները: Սակայն դատարանը որոշել է քաղաքական գործչին բանտ տեղափոխել՝ մեղադրական վճիռն իրականացնելու համար: Քաղաքական գործչի ազատազրկումը զանգվածային անկարգությունների պատճառ է դարձել:
